Ñahendu Hesu Ñe’ê. Martes 25 de febrero

Escucha el evangelio y la reflexión en: https://youtu.be/BpticCcAs_k

MARTES VII Tiempo Ordinario San Marcos 9, 30-37

Jesús ha idisípulo kuéra osẽ oho Galiléa jerére. Ha Jesús katu ndoipotái avave oikuaa
ha’e oikoha upe rupi, ombo’égui oikóvo idisípulo kuérape. He’i chupekuéra: — Umi che
rehe ija’e’ỹva niko che reitýta hína ha che jukáta hikuái. Ha amano hague 3 ára hápe katu,
aikove jeýta.

Idisípulokuéra katu ndoikuaái mba’épa pe Jesús he’íva chupekuéra. Ha okyhyjégui,
noporandúi chupe hikuái.

Jesús ha idisípulokuéra oguãhẽ Cafarnaúmpe. Ha oĩ jave hína hikuái Pedro rógape,
Jesús oporandu chupekuéra: — Mba’e rehe piko peñemongeta kyre’ỹ pejúvo tapére.

Ha’ekuéra katu okirirĩmba chugui. Oñe’ẽ niko oúvo ra’e hikuái mávapa pe tuichavétava
ijapytépe kuéra. Ha Jesús oguapy, ha ohenói umi 12pe. He’i chupe kuéra: — Oĩrõ pende
apytépe oñemoĩséva hapichakuéra ári, péva tapykuetépe oñemoĩ vaerã, ha oiko vaerã
hapicha kuéra rembiguái ramo.

Upéi ohenói peteĩ mitã ha omoñembo’y ijapytépe kuéra. Omboguapy hapypa’ũme ha he’i
chupekuéra: — Peẽ peguerohory ramo mitã ko’ãichagua, chéve che guerohory hína. Ha
chéve che guerohorýva, nda chéve añói che guerohory, upe che mbouharépe ave.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Nañahenduséi ningo problema, ñañembotavy ichugui, ñambohasa, ñande apysape.
Umi apóstol-pe nahesakãi Hesu he’íramo ohasa asy ha omanotaha, okyhyje avei oporandu
haguã, ndoikeséi karaguatatýpe. Máva piko oime oikeséva.

Ha uperiremínte oikovaíma oñondive hikuái, jahecha mávapa mba’e guasuve, mávapa la omandáva. Upe chentese, chénte aikuaa, che ha’éva oiko vaerã, che ajapo va’erã ajaposéva; upéva hina veneno ñanembohasy ha ñanemoingo vaíva oñondive.

Ha pe mba’asy pohã Hesu ome’ẽ ñandéve he’ívo: “pe oñemomba’e guasuséva oiko va’erã tapykuegua ha opavave rembiguái ramo”. Ha ohupi oañua peteĩ mitãme, ñanembo’e
haguã ñande ave jahayhu va’erãha umi ikangy, itavy ha ndojevaléiva ijeheguípe, umi
oikotevẽva, umi oñemboykévape.

Péicha jajapóramo che reindy ha nde che irũ, he’i Hesu hese jajapoha, ha Ñandejára mborayhu oimeha ñande pype. Ha péicha avei ñambogue jahávo ñande pype upe jejapo ha
chentese ponsóña, péicha jakuera jahávo ha oiko rangue ñande hegui aña ra’y térã aña rajy,
oiko ohóvo ñande hegui Ñandejára ra’y, Ñandejára rajy.

Pa’i Alberto Luna.