Ñahendu Jesús Ñe’ẽ. Lunes 30 de diciembre

Escucha el evangelio y la reflexión en: https://youtu.be/S3baRi7fxNE

Lucas 2, 22. 36-40.

Ha ohasávo 40 ára Jesús onase hague, ogueraha hikuái pe mitã Jerusalénpe, ha omoĩ Ñandejára renondépe. Upe jave oĩ hína avei tupaópe peteĩ kuñakarai iguãiguĩmava, proféta ha’e. Héra niko Ana, Penuel rajy, Aser ñemoñare. Omenda vaekue imitãme ha oiko jepe iména ndive 7 áño. Upéi katu iména omano. Ana ombotýma 84 áño, ha oiko ha’eño.

Araka’eve nosẽiva Tupaógui, ha omomba’e guasúva Ñandejárape ára ha pyhare. O’ajuna ha oñembo’e. Simeón oñe’ẽmba riremi, oguãhẽ sapy’a Ana. Ha oñepyrũ omomba’e guasu Ñandejárape. Oñe’ẽ pe mitã Jesús rehe opa umi oha’arõvape Jerusalén osẽ jejopy vaígui.

José ha María okumplipa rire Ñandejára mandamiénto, ojevy hikuái Nazarétpe, opytáva Galiléape. Pe mitã katu okakuaa ohóvo, henyhẽ arandúgui ha Tupã ohovasa chupe.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

Mitã kambu niko oparupi ojeguerohory ha ojecha ramo, ojehayhu ha oñemoñe’ẽ, ojehupi ha oñemboguata. Oĩ ohupi ha omboguata kuaáva mitã ha oime katu ndorekokuaáiva ha sapy’aitépe omyasẽva. Ha pe mitã avei oikuaávo ohóvo ndaha’éi oime raẽva ndive ojupíva, oiporavóma ha oñembo’ykéma ndojupiséiramo.

Aguéla niko pe ombojeroviavéva mitãme, omokunu’ũ ha ohayhu kuaáva. Kóva ko kuñakarai guaiguĩmi oiméva tupaópe osẽva omoñe’ẽ pe mitã oraháva karai José ha Tupãsy ñanemomandu’a ñande aguéla rehe, ñande rovasa ha imandu’áva ñande rehe iñembo’épe.

Ana ñanemondu’a avei heta kuñakarai itupao rayhúvare, oiko mantéva capilla, parroquia ha grupo rupi, oñembo’éva rosario ha omoherakuãva Ñandejára ñe’ẽ, oguahẽva óga háre, ojapo Navida en familia ha mba’e. Tuicha ñane pytyvõ ko’ã kuñakarai, heta tembiapo omomýi hikuái tupaópe, omopotĩ, omohenda, oraha yvoty, ombojegua mesa, ombo’ýva ñembo’e, opurahéi, hetápe oñemoñe’ẽ hikuái, hetáre oñembo’e, ojepy’apy mitã oñemongarai haguã, oiko haguã catecismo, ha hetave mba’e.

Reikuaápa che reindy ha nde che irũ ãichagua kuña karai. Ajépa iporãite va’erã ehechakuaa, eguerohorymi ha eagradece ramo ichupekuéra upe tembiapo ojapóva rehe. Mba’épa eñandu.

Pa’i Jasy.