Ñahendu Jesús Ñe’ẽ. VII dentro de la Octava de Navidad

Escucha el evangelio y la reflexión en: https://youtu.be/s_xocrr0EEs

31 diciembre: VII dentro de la Octava de Navidad

Juan 1, 1-18

Iñepyrũmbýpe niko oikóma vaekue voi upe Ñe’ẽ, ha pe Ñe’ẽ oĩ va’ekue Ñandejára ndive, ha Ñandejára va’ekue voi ha’e. Iñepyrũmbýpe, ha’e oĩ vaekue Ñandejára ndive. Ha’e rupi, Ñandejára ojapo opaite mba’e, ha ndaipóri mba’eve Ñandejára rembiapokue apytépe ojejapo va’ekue hese’ỹ.

Upe ñe’ẽme oĩ va’ekue tekovete, ha pe tekovete ohesape opa umi yvy ári oikóva rekove. Ko mba’e rendy omimbi pytũmbýpe, ha pytũ ndaikatúi ombogue.

Ñandejára omondo hembiguái peteĩme, hérava Juan Bautista. Omondo chupe omombe’u haguã opavavépe mávapa pe ohesapéva, ha opa ohendúva chupe oguerovia haguã upe he’íva. Juan ndoúi vaekue ha’e ñande resape haguã. Oñembou va’ekue katu, oñe’ẽ haguã mávapa upe ñande resapéva. Ha pe ñande resapéva niko añetegua hína, ou va’ekue yvy ári ñande resape haguã opavavépe.

Upe Ñe’ẽ ou oiko yvy ári. Ha Ñandejára ojapo ramo jepe opa mba’e ha’e rupi, avave ndoikuaaséi chugui mba’eve. Hetã teépe ou, hetãgua katu nomoguãhẽi chupe.

Umi chupe omoguãhẽ vaekuépe, umi hese ojerovia va’ekuépe, ha’e omoingo Ñandejára ra’y ramo. Chuguikuéra oiko Ñandejára ra’y, ndaha’éi ku yvypóraicha túva ha sy oiko haguére oñondive. Nahániri. Tupãite voi omoingo chupekuéra ta’ýra ramo.

Upe Ñe’ẽ niko ou va’ekue ñandéicha ha oiko ñande apytépe, mborayhu ha añetégui henyhẽ. Ore rohecha va’ekue heko marangatukue Túva ome’ẽ va’ekue chupe, ta’ýra peteĩete haguére ha’e. Juan niko hese oñe’ẽ va’ekue he’i ramo guare: “Kóva hína pe che mandu’a hague ku ha’e ramo guare: ‘Upe oúva che rire mba’e guasuve chehegui, oikove haguére che aikove mboyve.’”

Ha’e, henyhẽgui mborayhúgui, ore rovasa jo’a-jo’a. Tupã niko ome’ẽ va’ekue imandamiénto Moisés rupi, mborayhu ha añete katu ou Jesucristo rupi. Ndaipóri avave ohecháva Ñandejárape. Ta’ýra peteĩete, peteĩchava Tupã ndive ha oĩva Túva ykére, ha’e oikuaauka chupe opavavépe.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Tuicháramo jepe guyryry ha tyapu ko Navidad ha año nuevo rehegua oparupiete, ha heta ógape ojejapóramo jepe pesebre, oime okañýva ichugui pe Ñandejára jeju ñande apytépe.

Ñande rapicha ohasáva Navidad oñandu’ỹre Ñandejárape hekovépe. Ñama’emi ha ñapensami noiméipa hapykuere kañy avei ñande hegui avei San José, Tupãsy ha imemby Jesús. Nañañedesatinái imi mba’épa hína Ñandejáragui ha japyta pararã reípe.

Ani oiko ñande hegui he’íva San Juan: “Pe Ñandejára ou va’ekue yvy ári ha umi yvy arigua ndoikuaaséi chugui mba’eve. Hetã teépe ou, umi hetãgua katu nomoguahẽi chupe”.

Jahechami aipóramo che irũ ha che reindy mba’éichapa ñande ñamoguahẽta Jesús pe ha jaipe’áta ichupe ñane rokẽ, oike haguã ñande rekovépe ha ñanemoirũ ko año oñepyrũtavape.

Pa’i Jasy.