Ñahendu Hesu Ñe’ẽ. Lunes III de Pascua

Escucha el evangelio y la reflexión en: https://youtu.be/XVT9c4qP164

LUNES III DE PASCUA

San Juan 6, 22-29

Upérõ Umi héntekuéra opyta vaekue pe lágo mboypýri ohecha kuaa Jesús disípulokuéra ogueraha hague upe kanóa peteĩmi upépe oĩ vaekue. Ohecha avei hikuái Jesús ndohói hague hendive kuéra. Upe jave, oguãhẽ joa kanóape héntekuéra oúva Tibérias puéblogui.

Namombyrýi oñemboja hikuái upe Jesús omboja’o haguépe pan oñembo’e rire hese. Ha ohechávo ndaiporiha upépe Jesús térã idisípulo kuéra, ojupipa jey hikuái ikanóape ha oho Cafarnaúmpe Jesús rekávo.

Ha oguãhẽvo hikuái pe lágo mboypýri, ojuhu hikuái Jesúspe ha oporandu chupe: — Maéstro, araka’éiko reju ra’e ápe.

Jesús he’i chupekuéra: — Chéverõ guarã, peẽ chereka peikóvo pekaru haguére pene ryvãtã meve, ha ndaha’éi peikuaágui mba’épa he’ise umi milágro ajapo vaekue. Ani pejepy’apýtei tembi’u oñehundi vaerãre. Pejepy’apy uvei tembi’u oñehundi’ỹ va’erãre ha ome’ẽ vaerãva peẽme jeikove opave’ỹva. Upéva pe tembi’u che ikatu ame’ẽ peẽme, Ñandejára che Ru omoĩgui che pópe.

Oporandu hikuái Jesúspe: — Mba’éiko upe Ñandejára oipotáva ore rojapo.
Jesús he’i chupekuéra: —Ñandejára niko che mbou chéve, ha oipota pejerovia che rehe.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Mburuvicha ojapóramo iporãva, oipytyvõ ramo mboriahúpe ha oñeha’ãramo oiko porãve opavave, upéva rapykuéri lo mitã oiko voi, ika’avo ha ombyaty hetápe ijerekuévo.

Hesu avei omongaru rire hetaiterei tapichápe ndohejavéi chupe hikuái, oiko hapykuéri oipotágui ome’ẽve pe provísta ohupyty va’ekue ichugui. Ñande avei ñañeha’ã jakaru, ñañemonde ha ñande róga porãve haguã ha jaipota Ñandejára ñanepytyvõ jahupyty haguã
umi mba’e jahekáva ha ñaikotevẽva.

Hesu katu he’i jahekave va’erãha pe tembi’u omoingo ha omombaretéva ñande pype jerovia Ñandejárare ha mborayhu ñande rapicha rehe. Upéva ha’e ikatu ome’ẽ ñandéve.

Hesu ha’e pe tembi’u añete ñanemoingovéva ha opytáva ñande pype opa ára guarã. Ha’e ñane konvida ñañemboja ha jakarúvo hendive jareko haguã ñande pype tekove añete ñamongaru ha ñamombaretévo ñande espíritu.

Mba’épa nde che irũ ha che reindy reñandu orahavéva upe nde py’a ha ndepy’apýva ára ko’ẽre ha pe semána pukukue. Emopa’ũpa nde Ñandejárape nde rekove, ha eme’ẽpa ichupe ne tiempomínte jepe ehekávo upe tembi’u omombarete va’erãva nde espíritu. Hesu
oime ome’ẽse asy ndéve hína opa orekóva ndéve guarã.

Pa’i Alberto Luna.