Ñahendu Hesu Ñe’ẽ. Martes 2º de Pascua

Escucha el evangelio y la reflexión en: https://youtu.be/7egnpDPlKzw

MARTES II DE PASCUA

San Juan 3, 7b-15

Upérõ Jesús he’i Nicodémope: Opavave onase jey va’erã. Yvytu niko oipeju, oipejuseha gotyo. Ha rehendu ramo jepe, nderehechái moõguipa ou térã moõpa oho. Upéicha hína umi onase pyahu jeýva Espíritu Sánto rupi.

Nicodemo he’i jey chupe: — Mba’éichata piko upéva.

Ha Jesús he’i chupe: — Nde niko maéstro guasu Israélpe, ha piko ndereikuaái.

Añetehápe ha’e ndéve. Ore niko roñe’ẽ umi mba’e ore roikuaávare, ha romombe’u umi mba’e ore rohecha vaekue. Peẽ katu ndaperoviái umi mba’e ore ro’éva peẽme. Peẽ niko nda che reroviái añe’ẽ ramo peẽme umi mba’e ko yvy ári guáre. Mba’éicha piko aipo ramo
peroviáta añe’ẽ ramo peẽme umi mba’e yvágape guáre.

Avave niko ndohóiva gueteri yvágape, pe yvágagui ou vaekuénte, ha péva che hína. Ku Moisés, pe desiértope omopu’ã haguéicha yvate pe mbói ra’ãnga, upéicha avei che añemopu’ã va’erã ágã. Ha umi che rehe ojeroviáva, oikovéne opa ára.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Ñañeha’ã niko ñamoporãve ñande rekove, jajuhuse upe tape iporãvéva, añeteguáva, ani haguã jajavy, jajerure Ñandejárape ha ñaporandu ñande rapichápe mba’épa jajapo va’erã jaiko haguã tape porãre, jareko haguã pe vy’a añete ñande rekovépe.

Ou ningo karai Nicodemo Hesu rendápe oikuaase ha’e mba’épa he’i Hesu, mba’érepa ojapo umi mba’e ojapóva ha ombo’éva oikóvo. Hesu he’i ichupe tekotevẽha ojapysaka ha ohecha mba’épa Ñandejára Espíritu ojapo hína hekovépe, ojesareko haguã hembiasáre, Ñandejára Espíritu omba’apohápe hese ko’ẽ ko’ẽre.

Upéicha Hesu ñanembo’e hina pe Ñandejára Espíritu ñanesãmbyhyha ára ko’ẽre, omýi ñande rekovépe, omboguata ñane rembiapo, oñe’ẽ ñandéve ñande py’ápe ha ñande rapicha juru rupi, oguata ñande ykére, oñeñanduka ñandéve yvytúicha ñane rembiasa pa’ũme.

Ñahendu va’erã ichupe, he’i Hesu, ñapena hese ñane atõiramo, jaheja va’erã ñanemboguata ha ojapo ñande hegui Ñandejára ra’y ha Ñandejára rajy. Ñande ndaikatúi ñambopyahu ñande rekove ñande jehegui, ñañeme’ẽramo Ñandejárape ha jaheja ramo pe Espíritu Santo ñanerekombo’e katu oñeme’ẽta ñandéve heta mba’e porã yvágagui oúva.

Ndépa che reindy, ha nde che irũ, eñandúma sapy’a upe Ñandejára Espíritu ne atõi ramo, térã oñeñanduka ramo ndéve yvytu vevúi asýicha. Ha moõ gotyopa eñandu nemboguatase. Aníkena okañy ndehegui pe tekove pyahu rape Hesu ome’ẽséva ndéve.

Pa’i Alberto Luna.