Ñahendu Hesu Ñe’ê. Miércoles 01 de enero

Escucha el evangelio y la reflexión en: https://youtu.be/0uzH8mK4r8g

Lucas 2, 16 – 21.

Upe ramo umi ovecha rerekua pya’ete oho, ha ojuhu María ha Josépe, ha pe mitãme oñenóva hína pe mymba karuhápe. Ha ojuhúvo hikuái Jesúspe, osẽ omombe’u mba’épa he’i ra’e chupekuéra Ñandejára ángel pe mitãre. Ha umi ohendúva opondera joaite.

María katu oñongatúnte ko’ã mba’e ipy’apýpe, ha ojepy’a mongetámiva hese. Umi ovecha
rerekua katu ojevy hymba kuéra oĩháme. Tapére oho kuévo hikuái katu, oguerohory ha omomba’e guasu ohóvo hikuái Ñandejárape. Ojuhu niko ojehu hague Ñandejára ángel he’i
hagueichaite chupekuéra.

Ha Jesús onase hague 8 árape, oñesirkunsida, ha ombohéra hikuái pe mitã Jesús.
Ñandejára ángel péicha voi ojerure vaekue Maríape hye guasu mboyve.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…
Oĩ niko peteĩ purahéi Niño ára rehegua he’íva: “Ojeroky peteĩ estrella ohecha mbohapy pastor, mba’épa oime he’i, jaje’ói jahechami. Oje’ói niko ohechávo Melchor, Gaspar ha Baltasar, ojuhu ko niñomi, niño de nacimiento, ikupy pytã mimi, iñakã sa’yju mimbi, lo pastore niko he’i Manuel héra haguã”.

Vy’apópe jahecha ojotopa umi pastore niño Hesu, Tupãsy ha Señor San José ndive,
torypápe omombe’u hikuái mba’épa he’i chupe kuéra umi ángel Hesu rehe, ha opavave
ijurujái opytávo ohendúvo ichupe kuéra, Tupãsýrema katu oguapy iñe’ẽ, ha péicha avei
Señor San José oiméne hetia’e opytávo ojecharamógui pe mitã. Vy’apópe avei oje’ói pastorkuéra ohecha rire Hesu mitãmíme, oguerohory Ñandejárape ohóvo.

Ha péicha ningo ou Ñandejára ñande apytépe, Jesucristo rupive ojechauka ñandéve.
Péicha avei ko’ãga peve ijaty opárupi, comunidad-pe, grupo-pe, capilla, movimientokuéra
ha tupaópe heta tapicha ohekáva Ñandejárape ipy’aite guive ha oguatáva Hesu rekávo.

Umíva ojotopa ohendu haguã Ñandejára ñe’ẽ, omombe’u haguã ojupe mba’épa Ñandejára
oñanduka ichupe kuéra, mba’épa ojapo hekovépe.

Mba’etekópa che irũ ha che reindy la nde espíritu hína ko año oñepyrũvape reñemoĩ kyre’ỹvo tapépe eheka ha ejuhu haguã Hesúpe evy’ávo nde avei umi pastorkuéra ovy’a haguéicha oñuguaitĩvo hendive isy ikére.

Pa’i Jasy.