Ñahendu Hesu Ñe’ê. Miércoles II de Cuaresma

Escucha el evangelio y la reflexión en: https://youtu.be/8ki82c05-LE

Miércoles II Cuaresma Mateo 20, 17 – 28.

Jesús oho jave Jerusalén gotyo, ogueraha ha’eñoháme umi 12 idisípulokuérape, ha
he’i: — Jaha niko hína Jerusalénpe. Upépe oĩta che moĩva pa’i kuéra ruvicha ha Moisés
léi ombo’éva pópe. Ha’e kuéra katu ojeruréta ajejuka haguã. Upéi che moĩne ágã hikuái
pytagua pópe oñembohory haguã che rehe hikuái. Che nupã ha che mosãingo rire
kurusúre katu, aikove jeýta ára mbohapyhápe.

Santiágo ha Juan sy oñemboja Jesús rendápe, imemby mokõive ndive, ha oñesũ
henondépe. Ojerurese hína ra’e chupe peteĩ mba’e. Jesús oporandu chupe:
— Mba’éiko reipota.
Ha’e he’i chupe: — Ágã reguapy vove ne Rréinope, aipota ko’ã che memby mokõi
oguapy ojovái nde ykére.

Jesús he’i chupekuéra: — Ndapeikuaái ete mba’épa pejerure hína. Peime nga’u piko
pehasa asy haguãicha umi mba’e che ahasa asýtava rupi.
Ha’ekuéra he’i: — Héẽ, roime.

Jesús he’i chupekuéra: — Pehasa asýta añete che ahasa asytaháicha. Peguapy haguã
che ykére katu, nda’ijái chéve ame’ẽ avavépe. Che ru upe he’ítava mávapa umi oguapy
vaerãva che ykére.

Umi 10 disípulo ohendúvo upéva, ipochy Santiágo ha Juan ndive. Upémarõ Jesús
ohenói chupe kuéra, ha he’i: — Peẽ niko peikuaa mba’éichapa umi mburuvicha oñembojára hetã guáre ha umi poguasu katu ipo pohýi hendive kuéra. Pende apytépe katu ndaupéichai vaerã. Upéva rangue, pe tuichaséva pende apytépe toiko pene rembijokuái ramo. Ha pe itenondeséva pende apytépe, toiko pene rembiguái ramo.

Che niko ndajúi ahekávo che rembiguáirã. Aiko haguã tembiguáirõ uvei, ha ame’ẽ haguã che rekove ojesalva haguã heta.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mávapa tuichave, mávapa omandave. Py’ÿi niko mburuvicha kuéra, partido políticokuéra apytépe, ha umi partído ryepýpe jey umi movimiento, oñemohãimbiti ojupe, ojohova api ha ojokupylia, jahecha mávapa la kavaju opunteáva, térã katu máva upe ho’a porãvéva pe número úno ykére. Hesu apóstol kuéra apytépe jepe ñahendu oĩha opunteaséva hapicha kuéragui, omanda guasuséva, oñemoĩséva Hesu ykére mburuvicháicha.

Mba’épa reñandu che irũ ha nde che reindy, ko Hesu he’ívare: pe tuichaséva oñemoĩ va’erãha tembiguái ramo, ojejokuái haguãicha hapicha remikotevẽre oma’ẽ haguã. Ndaha’éi hína oreko asy ha omomba’apo haguã avavépe ombyatývo ijupe guarã. Mba’éichaitépa ikatúne nde eñemomichĩ mieve, Hesu ojapo haguéicha, ome’ẽ peve hekove ñande rayhupápe.

Pa’i Alberto Luna.