Ñahendu Hesu Ñe’ê. Sábado I de Cuaresma

Escucha el evangelio y la reflexión en: https://youtu.be/DcwV_8dxRCg

Sábado I Cuaresma Mateo 5, 43 – 48.

Upérõ Jesús he’i: Peikuaa avei oje’eha: “Ehayhu nde rayhúvape, ha nde rayhu’ỹvape katu nahániri.” Che katu ha’e peẽme: “Pehayhu umi pende rayhu’ỹvape, ha pene mbohasa asývape. Peñembo’e hesekuéra. Péicharõ, pehechaukáta hína pejapoha upe pende Ru yvagapegua oipotáva. Ha’e niko oheja kuarahy ojope iñañávape ha ipy’a porãvape.

Ha’e hína pe oguerúva ama umi hembiapo porãvape ha umi hembiapo vaívape. Pehayhúrõ pende rayhúvape año, piko mba’éicha Ñandejára omyengoviáta peẽme pene rembiapo.

Impuesto mbyatyha jepe niko ohayhu hapichápe. Ha pemomaitei ha peñakãity
ramo umi peikuaávape añónte, piko mba’e iporãva oĩ upévape. Umi Ñandejárare
ojerovia’ỹva jepe niko péicha ojapo. Ta pende py’a porã pende Ru yvága pegua ipy’a
porãháicha.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ou ramo peteĩva ñande rova pete, opoko ñane nambíre, térã oñe’ẽ reity ñandéve ñande rovápe, hasy nunga hina japyta haguã py’aguapýpe, upéva rangue ñande ruguy raku ha ñande pochýne. Ha mbykyete hína ñambyegovia pohyive haguã pe ñande rehe ojapóva,
jaikuaauka haguã chupe, ani upéi ou jey oñembohoryse ñande rehe hina.

Ijetu’u lénto pe Hesu ojeruréva ñandéve, ajépa. Ñande niko añete hápe jahayhu umi ñande rayhúvapente ha jaiko vai umi nañande rayhúiva ndive. Péva ha’e pe osẽva ñande py’águi ha ñaneremiadúgui. Hesu katu he’i Ñandejára ñande Ru ohechaukaha mborayhu peteĩcha iñañáva ha imba’e porãva peguarã, omopu’ã kuarahy ha ombou ama heko potĩ ha heko ky’áva peguarã.

Ikatúnepa che reindy, ñande ñande jehegui jajapo avei Ñandejára ñande Ru ojapo háicha. Ikatúnepa che irũ, ñañembo’e umi ndaija’éiva ñande rehére. Noimeichénepa ñande rova mokõita mba’e jahayhu gua’úrõ umi ñande reko asývape ha ipochývape ñanendive.

Ñandejára ojerure ramo ñandéve niko ikatúguinte he’i ñandéve jajapo haguã, ha ha’e ome’ẽtagui avei pu’aka jajapo haguã. Ñaikotevẽ hese, ha jajerure va’erã ichupe jahecháma
ramo ñande jeheguínte ndaikatu mo’ãiha.

Mborayhu niko ndaha’éi upe ñañandúva añónte, mborayhu tenonderã ha’e tembiapo porã jajapóva ñande rapichápe. Ha upévare ikatu jajapo iporãva ñañandu ramo jepe pochy ñande py’ápe. Nañañeme’ẽiramo py’arópe ha upéva rangue ñañe’ẽ ha ñanemba’e porã ramo ñane kontrário ndive, péicha ndaha’véima ñande jehegui ñamýiva, Ñandejára Hesukrísto espíritu hina pe ñanemomýiva.

Pa’i Alberto Luna.