Ñahendu Jesús Ñe’ẽ. Viernes I de Cuaresma

Escucha el evangelio y la reflexión en: https://youtu.be/RvU2kZmqjGw

Viernes 1º Cuaresma Mateo 5, 20 – 26

Jesús he’i idisípulokuérape: Che ha’e peẽme, peẽ peñeha’ãve ramo pejapo haguã Ñandejára rembipota umi fariséo téra Moisés mandamiénto ombo’évagui, peikéta Ñandejára Réinope.

Peẽ niko peikuaa oje’e hague pende ypykuérape yma: “Aníke reporojuka. Oporojukávape hekovia vaerã hembiapokue.” Che katu ha’e peẽme: “Opavavépe oñemyengoviáta hapicha ndive ipochy haguérente jepe. Ha oimérõ he’íva hapichápe ‘Nde výro’, upéva ojereraha vaerã karai juez renondépe. Ha oimérõ he’íva hapicháre ‘Nde aña ra’y’ upéva ohóta ochyryry Aña retãme.

Upévare, eraha ramo hína ne ofrénda tupaópe ha ne mandu’a sapy’a nde rapicha ipy’a vaiha ne ndive, eheja ne ofrénda pe altar renondépe. Pya’e tereho nde rapicha rendápe ha eñemoĩ porã raẽ hendive. Upéi katu eju ha eme’ẽ ne ofrénda.

Oĩ ramo nde rerahaséva karai juez rendápe, tapérema voi eñeha’ã eñemoĩ porã hendive. Cháke karai juez ne mondóne préso, ha upégui rehasáta kárselpe. Ha upégui neresẽ mo’ãi neremyengoviapái peve pe karai juez omoĩ va’ekue ndéve.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Oiko peteĩ degrásia nde vaíva” he’i ningo lo mitã oime ramo ojejukáva. Ha degrásia añete ñande rapicha ojejukáva térã katu oporojukáva. Kuimba’e ojukáva hembirekópe. Guerra hápe oñorairõ ha ojojukáva, dróga ha ka’úre oporojukáva, ojesecuestráva ha ojejukáva. Mitã ojeitýva isy ryégui onace mboyve ha ojejukáva.

Jesús ñanemomandu’a ñande rekove tuichave mba’e jarekóvagui ha ndahekoviáigui ko yvy ári nda’ijái avavépe ojuka hapichápe. Tekove ha’e Ñandejára remime’ẽ tekotevẽva ñane rakate’ỹ ha ñañangareko.

Ani reporojuka, he’i voi ningo Ñandejára mandamiento. Jesús katu ojerureve ñandéve upéa ári jey. Ani ñañembohory avavére, jajeheja tie’ỹ, juru guasu ha jererosapukái ñande rapicha ndive.

Jesús he’i umíva ikatuha ñanekondena ha ñanembo chyryry amo Aña retãme. Ha oime ramo che irũ ha che reindy ñande rapicha jaiko vai haguére ñande pochy térã ipochýva ñane ndive, ani ñambopukueterei jaha haguã ñañemongeta. Jaheka mba’éichapa ñañemoĩ porãta oñondive, ñañoperdona ha jajora haguã pe oñeñapytĩ su’u ha ñande jopýva. Marãve ndovale mo’ãi ñembo’e puku nañañemoĩ porã raẽi ramo ñande rapicha ndive. Ágã upéi jaháne ñañembo’e.

Pa’i Alberto Luna.