Ñahendu Hesu Ñe’ẽ. Viernes IV de Pascua

Escucha el evangelio y la reflexión en: https://youtu.be/j17i8CMOu-o

San Juan 14, 1 – 6

Upérõ, ohasa mboyvemi Tupã ykére, Jesús he’i idisípulokuérape: — Ani pejepy’apy.

Pejerovia Ñandejárare ha pejerovia avei che rehe. Heta rendaguã niko oĩ che ru rógape. Ha che aha hína ambosako’i haguã peẽme pene rendaguã. Nda’upéichai rire, namombe’úi va’erã mo’ã peẽme. Ha ambosako’i rire peẽme pene rendaguã, aju jeýta pogueraha che ndive.

Péicharõ, peẽ peiméta pe che ahatahápe. Peẽ niko peikuaa voi pe tape peho haguã che ahatahápe.

Tomás he’i chupe: — Maéstro, ndoroikuaái niko moõpa rehóta. Mba’éicha piko aipo ramo roikuaáta pe tape.

Jesús he’i chupe: — Che niko hína pe tape, upe añete ha upe tekove. Che rupi mante ikatu peguãhẽ che ru
rendápe.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

Jajepy’apy ningo añete ko’ẽramorãre, ñambyaty ha ñañongatu ani haguã japyta mba’eve’ỹre, ani haguã ñande jopy tekotevẽ ha ñande juhu po nandi. Ha ñama’ẽ vaerã niko añete ñande renonderãre, ñambosako’i ha ñamohenda ñande raperã, ñama’ẽ va’erã moõ gotyopa jahata, mba’épa ñane rembiaporã, jajapo planificación, ñamboguata proyecto ndaha’éiva sapy’arã, upéicha mante ikatúta ñande pu’aka tíro pukúpe.

Hesu he’i ani haguã umíva apytépe jajepy’apy eterei, jajerovia haguã Ñandejárare ha jajerovia haguã hese avei, ani ñaimo’ã ñaneñoha tapére. Ha’e oguata hína ñande ykére, ha oguata avei ñane renonderã, opuntea ñande rape ha ombosako’i ha omohenda ñandéve ñane rendaguã, nañakañýi hina chugui.

Ha’e niko oúvo Ñandejára ykéregui oiko haguã ñandéicha, ou ohechauka haguã ñandéve tape jaguata haguã, ohechauka haguã ñandéve mba’éichapa jaiko va’erã oñondive ko múndope, vy’a ha vy’a’ỹme. Oiko rupi yvypóra ñandéicha niko ha’e oikuaa ñane rembiasa, ha oñandu kuri avei ipirépe umi ñande py’apýva ha umi mba’e ñanembovy’áva avei.

Ha upéicha opaite mba’e ñande jahasáva nokañýi ichugui, ha’e avei ohasa haguére upérupi. Ikatu aipóramo che reindy ha nde che irũ eñemboja hese, ehendu ichupe, ema’ẽ hese, emombe’u ichupe ehasáva, eikuaa pype ha’e oñanduha upe nde reñandúva ha oimeha nde ykére ne renohẽ haguã tapépe.

Ndajaikuaapáiramo jepe ñanera’arõva, jakyhyje ramo jepe heta mba’égui opu’ãva ñane renonderã, Hesu ñanembopy’aguasu jaikuaa rupi oĩha oñangarekóvo ñande rehe jaguata ha jaipykúi aja ñande rape, ndopoiriha ñande hegui araka’eve, ha amo hu’ãme avei ñane ra’ãrõha ñanemohenda porãite haguãme hendive Ñandejára ykére.

Pa’i Alberto Luna.