Ñahendu Hesu Ñe’ê. Viernes Santo

Escucha el evangelio y la reflexión en:https://youtu.be/kKDgJp7hjZ4

Viernes Santo

Juan 19, 17-18. 25-42.

Upérõ Jesús osẽ ikurusu ijapére oho haguã Gólgotape. Judío kuéra ñe’ẽme niko
upéva he’ise “Akã kãngue Renda”. Upépe omosãingo chupe hikuái kurusúre. Ha
hendive oñemosãingo avei mokõi kuimba’e, ojovái ijyképe. Jesús katu mbytépe.

Jesús kurusu ypýpe oĩ hína isy María, ha itia María ku Cleofás rembireko, ha María
Magdaléna ave. Jesús ohechávo isýpe ha ijykére oĩha hína pe idisípulo ha’e ohayhúva.

He’i isýpe: — Péina upépe ne memby.

Upéi he’i idisípulope: — Péina upépe nde sy.
Upe guive, pe Jesús disípulo ogueraha Maríape hendive hógape.
Jesús oikuaa omohu’ãmaha hembiapo. Ha oiko haguã Ñandejára Ñe’ẽme he’iháicha,
osẽ he’i: — Che yuhéi.

Upe rupi oĩ hína peteĩ vinágre ryru. Upépe omyakỹ hikuái peteĩ espónha, oñapytĩ
hikuái peteĩ yvyra apýre ha omboja Jesús jurúre. Jesús ho’u’imi ha upéi he’i:

— Ápe opa.

Páskua ára arete mboyve upérõ, ha ko’ẽvo niko pytu’uha árata hína. Judíokuéra ndoipotái avave retekue opyta osãingo kurusúre upéva upe árape. Oho ojerure hikuái Pilátope ohetyma mopẽ haguã umi kurusúre osãingóvape pya’eve omano haguã hikuái, ha oñemboguejy haguã kurusúgui. Umi soldádo oho ha ohetyma mopẽ umi mokõi osãingóva Jesús ykére.

Oñembojávo Jesús rehe katu, ohecha hikuái omanóma hague.

Upévare nohetyma mopẽi chupe hikuái. Peteĩva umi soldádo katu oikutu chupe ijyképe
lánzape, ha upe ojekutu haguégui osẽ tuguy ha y.

Oĩ vaekue peteĩ ohecha vaekue ko’ã mba’e, ha ha’e omombe’u mba’épa ojehu upérõ.

Ha añeteguánte upe omombe’úva ha ikatu perovia he’íva. Ko’ã mba’e niko péicha ou
vaekue ojehu oiko haguã ku Ñandejára Ñe’ẽme he’íva “Peteĩnte jepe ikãngue nomopẽiri
chugui”. Ha Ñandejára Ñe’ẽme he’i avei “Omaña vaerã hikuái upe ojekutu vaekuére”.

José va’ekue niko Arimatea pueblopegua. Oho ha’e ojerure Pilátope ndikatúipa ogueraha Jesús retekue. José niko Jesús disípulo vaekue. Ñemihámente oikómi va’ekue okyhyjégui umi judío kuéra ruvichágui. Pilato he’i chupe ikatuha ogueraha Jesús retekue, upémarõ José oho omboguejy pe kurusúgui. Nicodemo, ku peteĩ pyharépe oho va’ekue Jesús rendápe oho hendive. Ogueraha hikuái 30 kílo rupi pohã Jesús retekue ombalsama haguã.

José ha Nicodemo olia paite Jesús retekue aópe, ha oñohẽmba porã hese umi mba’e ryakuã porã ogueraha vaekue hikuái. Judíokuéra niko péicha voínte ojapóva ihénte manórõ oñotỹ mboyve. Upe Jesús omano hague ypýpe niko oĩ peteĩ kokue. Ha upe kokuépe oĩ peteĩ itakua ojejo’o ramóva ave oñeñotỹ’ỹ haguépe gueteri avave. Ha hi’aguĩ porãgui pe itakua ha ka’arúguima ha oñepyrũtamagui pytu’uha ára, omoĩ hikuái Jesús retekue upépe.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mba’eichaitépa ikatúne che irũ ha nde che reindy, eñembojami eñandu ha emoirũ Hesúpe oiméva hína ohasa asy nde rapicha mboriahu, hasýva, oiko’i, oikotevẽ, terã ojejopýva hína, umi nde reikuaáva apytépe, eñemoĩmínte haguã ijykére sapy’a ani opyta ha’eño rei anga.

Pa’i Alberto Luna.