Ñahendu Jesús Ñe’ẽ. Vigilia Pascual Sábado Santo

Escucha el evangelio y la reflexión en: https://youtu.be/Xow6xgXpHic

Vigilia Pascual Sábado Santo Ciclo A

Mateo 28, 1-10.

Pytu’uha ára ohasa rire, Domíngo ko’ẽme, María Magdaléna ha María, Santiágo ha José sy, oho hína ohechávo pe Jesús oñeñotỹ hague. Ha upeichahágui oiko sapy’a peteĩ yvy ryrýi neratãva.

Ñandejára ángel peteĩ oguejy ra’e yvágagui, ha oipe’a rire pe ita pe itakua juru ombotýva, oguapy hi’ári. Pe Ñandejára ángel omimbi ára veráicha ha pe ijao katu aramirõicha morotĩ sakã. Ohechávo chupe, umi soldádo oryryipa kyhyjégui, ha ho’a ojepyso yvýpe te’õnguéicha. Upévo, Ñandejára ángel he’i umi kuñáme:

— Ani peñemondýi. Aikuaa niko pehekaha hína Jesúspe, ku oñemosãingo va’ekue kurusúre. Ndaipóri véima ápe. Oikove jeýma, he’i haguéicha. Peju pehecha hendague.

Upéi katu, pya’e tapeho ha pemombe’u idisípulo kuérape oikove jey hague. Ko’ág̃a oime oho hína pene renonderã Galiléape, ha upépe pehecháta chupe. Kóva pe arekóva amombe’u hag̃ua peẽme.

Kyhyjepópe ha tuicha vy’a reheve avei, umi kuña pya’e osẽ pe itakuágui ha oho omombe’u umi Jesús disípulokuérape oikove jeýma hague. Peichaháguinte, Jesús osẽ sapy’a haperãme, ha omomaitei chupekuéra.

Oñemboja hikuái Jesús rendápe oañuã ipy, ha oñesũ henondépe. Jesús he’i chupekuéra: — Anivéma pekyhyje. Tapeho peje che irũ nguérape toho Galiléape. Upépe che recháta hikuái.

ÑAMBOGUEJY ÑANDE REKOVÉPE

Oĩ niko peteĩ ñe’ẽnga he’íva: “Igústo jey rei, he’i ihénte manomba va’ekue”. Ha ikatúramo jepe ñapensa kachiãigui rei lo mitã péicha he’i, ikatu avei ñapensa jajedegrasia vaivéramo jepe, ndaipóri mba’eve ko múndope -mano jepe- ikatu’ỹva Ñandejára omohenda amo ipahápe iporã haguãicha.

Pe kurusu árape ha ñembo’e pahápe ningo ñambojeguapa pe kurusu yvoty iporãvévape ha ñamyataindy jajái, jaikuaa pype Ñandejára pógui mba’eve nokañýi, ha ha’e ñande gueru jeýne hendápe amoite aña retã ruguágui jepe ñanemoĩ haguã ijykére.

Ha upévare ñande ja’éva vointe: “esperánsa nahavẽi ha konsuélo ndaitujúi”.

Ñahendu kuri mba’éichapa umi Ñandejára ánhel he’i umi kuña oñembyasývape, ani peñemondýi, Ñandejára oikove ha penemoirũta pende guatápe. Ko’ã ára jahasávape che irũ ha che reindy, ñaikotevẽ avei ñande ñahendu Hesúpe, he’íva ñandéve: Anivéma
pekyhyje, che aime penendive.

ÑAÑEMBO’E OÑONDIVE

Ñandejára Hesukrísto, nde rehupi vaekue nde apére ore jehasa asy embogue haguã ore pekádo, eñemo’ãguimi kena ore róga ha ore vállere, ha eju embovevúi oréve ore kurusu.Ore avei ikatu haguãicha romoirũ ore rapicha ikangyvévape. Amén.

Pa’i Alberto Luna.