Ñahendu Hesu. Sábado 12ª Tiempo Durante el Año

Escucha el evangelio y la reflexión en: https://youtu.be/m4fUzN_p5Z8

Domingo 13 a Durante el Año Ciclo A Mateo 10, 37 – 42.

Upérõ Jesús he’i idisípulo kuérape: Pe itúva térã isýpe ohayhuvéva che hegui, ndikatu mo’ãi oiko che disípulo ramo. Pe ohayhuvéva ta’ýra térã tajýrape che hegui, upéichante avei. Ha pe ohupi’ỹva ikurusu ijapére che moirũ haguã, péva ndaha’éi che rehegua. Pe hekovére hakate’ỹva, omanóta. Pe omanóva che rehehápe katu, ojesalváta.

Oĩ ramo pene moguãhẽ porãva, chéve che moguãhẽ ramo guáicha hína. Ha upe chéve che moguãhẽva, omoguãhẽ avei che mbouharépe. Umi profétape omoguãhẽva katu, proféta haguérente pe oguãhẽva, umívape Ñandejára ome’ẽta pe ha’e ome’ẽva proféta kuérape. Oĩ ramo ymínte jepe ome’ẽva che disípulope, michĩvévape jepe, che ha’e peẽme, Ñandejára ndahesarái mo’ãiha chugui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Nde delikádo itereíramo na eñalambra mba’e”. He’i ningo lo mitã oiméramo ñande rapicha ipire pererĩ etereíva, ha ndaikatúiva voi oñemona tembiapópe, ojehe’a ha ojetyvyro arriéro pórtepe.

Ndaivaíri jepe ningo pe ñañangareko ñande jehe, ñande róga guáre, ha jajapopa tekotevẽva jajapo ñane resãi ha jaiko porã haguã oñondive, ani haguã avei ñambohasyve ambuépe. Ko’ápe ningo Jesús ou he’i ñandéve hína upe oñalambráva ha hakate’ỹ eterei rasáva ijehénte voi ha hogaguárente, noiméiramo guáicha avavete voi ijykére ha ijerére, peichagua ndaikatu mo’ãi oiko hendive, he’i.

Ndaikatu mo’ãi he’i ijehe ha’eha cristiano, Jesús irũ. Jesús ningo ñane konvida ñamopu’ã haguã ñande resa ha ñande py’a, jahecha ha ñañandu haguã ñande rapicha kuérape, ñande rekoha, ñande comunidad, ñande puéblo, ñande ciudad, ñane retã ha ñane múndo jepe, tuicha háicha. Japytáramo ñande kuara’ípente ndaikatu mo’ãi jaguata hendive.

Tuicha pe Ñandejára Jesucristo korasõ ha pe imborayhu ndaijapýrai. Ha’e ningo ipy’a porãgui omboja’o orekomíva. Omoirũ haguã hasýva, iñembyahýi ha ikane’õva, ha’e oñembotapykue ha oñembyesarái kane’õgui oma’ẽ haguã hapicháre. Ndaha’éi ku hakate’ỹ
etereíva ijehe, noñalambrái. Ha upéicha ñanembo’e mba’épa he’ise upe “hakate’ỹva ijehe oñehundi ha pe oñehundíva hapicha rayhupápe, upéva ojesalváta”. Péva ningo upe ha’e ojapo vaekue py.

Ymínte jepe ñame’ẽramo ñande jehegui, ñane tiémpo, ñande pláta, ñane rembiapo, ñamboja’óva ñande rapicha ndive, Ñandejára rayhupápe, ndopyta rei mo’ãi, he’i Jesús. Péva Ñandejára oanotáta ñandéve amo ilívro guasu oĩva yvágape, he’i. Pe ymíko he’ise natekotevẽiha heta mba’e jareko ñamboja’o haguã. Pe he’iséva hína upe jarekomívagui, ñame’ẽramo ñande py’aite guive.

ÑAÑEMBO’E OÑONDIVE

Ñandejára Jesucristo, nde niko rehupi va’ekue nde kurusu ha emboguata, ha eñandúvo mba’éichapa ne irũ nguéra nde reja ne ño, nandepochýi va’ekue hendive kuéra. Ehecháma niko mba’éichapa ore avei ore kangy ha ore pituva rohasa asy jave ha romoirũ haguã oiko asývape. Ore pytyvõmi kena ha ani ore reja, rohasa asy jave ha orembopy’a guasu romoirũ haguã ohasa asývape, nde rejapo haguéicha. Amén.

Pa’i Alberto Luna.