Ñahendu Hesu. Sábado 34º Durante el Año

Escucha el evangelio y la reflexión en: https://youtu.be/IPQQdIS53as

Sábado 34º Durante el Año

Lucas 21, 34 – 36

Upérõ Jesús he’i idisípulokuérape mba’éichatapa upe ára ha’e ou jeytaha: Peiko kuaáke. Ani pekaru ha peka’úvonte peiko, térã pejepy’apy peikóvo mba’épa penohẽvéne pende rekovégui.

Cháke ára paha ho’áne pende ári ñuhãicha. Avavete yvy ári oimo’ã’ỹ jave niko oúne ág̃a. Peñembosako’íke aipórõ. Peñembo’e ára ha pyhare, ikatu hag̃uaicha peropu’aka opa ko’ã mba’e. Péicharõ ikatúta avei peime che ndive.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Oñepyrũma hína oñeñanduka ha hyakuã upe áño paha. Propaganda, rádio, télepe, diáriope, oparupi oñekuave’ẽ. Oñembovera ñande resa renondépe, ñanembodesea, ñanembyetia’e sapy’ánte ikatu’ỹ va’erã jahupyty ha jajoguapa.

Oiméma ombojeréva iñakãme mba’épa ojapóta Navida, áño nuevorã. Tembi’u, omboy’umi va’erã, oiméma ojeruréva hína ao pyahu, sapatu, toñepintáke óga, toĩke pan dulce, sidra, tahyapúke bómba, toĩke lu rendy ñande róga renondépe, hendy ha oguéva.

Arbolito ma katu, Papa Noel rendyva puku, pesebre, toikóke sapukái, purahéi, musikapu ekípo mbaretépe mombyrýgui oñehendúva. Mercádopema katu hénteta iñakãrakúva, ou ha ohóva, tahýi tarováicha ojuasapa. Tojeporúke aguináldo opa peve.

Heta ñande rapichápe ype apére ýicha ohasa upe Níño ára. Hetáre ndojekytýi jepe cristiano rekove ombopyahumívo mba’e. Ñandejára ou, ohasa, ombota okẽ, ha pe bombapu ha musikapúgui noñehendúi, ndojehechakuaái ha noñemoguahẽi. Heta ojavy pe Ñandejára grasía porãite oimegui ipy’a renyhẽ heta mba’e pota ha jepy’apygui.

Hesu he’i ñandéve ani haguã ñande py’a tarova ko’ã mba’e rehe. Jaipe’a ñande resa ha ñande py’a jahecha haguã mba’éichapa ha’e ou añete ñande rekovépe. Ko Navida rapére jahávo na, che reindy ha nde che irũ, ñaha’arõ Hesúpe. Ñambopyahu ñande rekovemi.

Ñañemoĩ porã jaiko vaíva ndive, ñamoirũ ñande rapicha oiméva ohasa asy. Upéicha ñahuguitĩta añete Hesu, nokañy mo’ãi ñande hegui, ha tuicha ñande rovasáta. Ojajáita ñane akã ári upe mbyja omombe’úva Níño ára ñande resape potámaha.

Pa’i Jasy.