Ñahendu Hesu. Sábado 9ª Tiempo Durante el Año

Escucha el evangelio y la reflexión en: https://youtu.be/nBOZh_tx5IQ

Sábado 9ª TDA Marcos 12, 38 – 44

Upe jave, Jesús ombo’évo hína, he’i: Peñeñangarekóke umi Moisés léi ombo’évagui. Ha’ekuéra niko oñemonde ao porã-porãme. Ha mamo oikoha rupi oipota ñamomaitei chupekuéra ku karai guasúrõ guáicha hikuái.

Tupaópe térã karu guasuhápe katu, oĩ porãvetahápe voi oguapy hikuái. Umi kuña imenave’ỹva róga omonandipa, ha upéi katu oñembo’e puku-puku gua’u hikuái. Umíva ojekastiga rasyve vaerã ág̃a opavavégui.

Jesús oguapy hína tupaópe upe ofrénda ryru rovái. Omaña hína mba’éichapa ojeju joa, ha ojeity pype pláta.

Umi irríkova oheja heta-heta. Upéi katu og̃uahẽ sapy’a peteĩ kuña viúda mboriahumi. Ha oheja avei ha’e mokõi nikelmi.

Upévo, Jesús ohenói idisípulokuérape, ha he’i chupekuéra:— Ko kuña mboriahumi niko hetaiteve ome’ẽ opavavégui. Opa ome’ẽva niko omoĩ umi chupekuéra hembývagui. Ha’e katu imboriahu pa’ũme, ome’ẽmbaite oguerekóva, hembi’u repy rangue jepeve.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Ndaha’éi ao ñande apóva, ñande jajapo ichupe. Iporã térã osoróva ñande apére jarekóva, ipype karameguãicha akóinte hína ñande”. Péicha he’i peteĩ ñe’ẽ poty, ha péicha avei he’i Hesu ani haguã jaiko jajechaukase.

Ndaha’éi hina upe jajapóva jajechauka haguã upe ovaléva. Upe jajapóva ñande py’aite guive hina la ovaléva, michĩramo jepe. Ha Hesu he’i oimeha oñembo’e pukúva ha omoĩva ijapére opaichagua mba’e karai ojechauka haguãnte, oipotágui oñemomba’e guasu ha ojeapo mba’éramo. Umíva oiporu Ñandejárape, hérape gua’u ojapo ha amo ipahápe ijupe guarãnte ombyaty hapicha mba’éva.

Umíva oñenupã rasyvéta he’i Hesu, ombotavýgui hapichápe oiporúvo Ñandejára réra okaru haguã hese.

Hesu ohecha avei pe tupaópe oñeme’ẽha viru. Ha ohechakuaa umi imba’e retáva ome’ẽ heta hetavéramo jepe noñandúi upe ome’ẽva hetaiterei orekógui. Tembyrénte ome’ẽ Ñandejárape ha upéicha nomomba’eguasúi ichupe ipy’ápe. Ha pe kuña viúda mboriahumi omoĩva katu, sa’íramo jepe, omomba’e guasuve Ñandejárape, ome’ẽmbágui orekomíva.

Oipe’a ijurúgui ha ome’ẽ. He’i ningo San Alberto Hurtado: “Ñame’ẽ va’erã ñande jehegui ñañandu peve hasyha ñandéve”. Pe hembýva niko mba’evérõ guáicha, háime ñamombo ranguéntema ñame’ẽ. Hesu katu ñanembo’e ñame’ẽramo Tupãme ha ñande rapichápe ñame’ẽ vaerã pe iporãvéva.

Reñandúpa che reindy ha nde che irũ mba’éichapa ijetu’u ñame’ẽ upe ñaikotevẽ ha ñanerakate’ỹva apytégui. Upépe hasyve ñande pojera haguã. Ajépa.

Pa’i Alberto Luna.