Ñahendu Jesús Ñe’ẽ. Sábado III de Cuaresma

Escucha el evangelio y la reflexión en: https://youtu.be/_G3WGR8FZh4?feature=shared

Sábado 3° Cuaresma

Lucas 18, 9 – 14

Upérõ ojapysaka hína Jesús rehe heta ojejapóva ha ojeroviáva ijehe ha oapo’íva hapichápe. ha Jesús omombe’u chupe kuéra kóva ko káso.

“Oho ndaje tupaópe mokõi kuimba’e oñembo’évo. Peteĩva fariséo ha pe ambue katu impuésto kovraha. Pe fariséo oñembo’y ha oñembo’e kóicha: “Ñandejára, ame’ẽ ndéve grásia na che mondáigui, nda che reko añáigui ha namyakãratĩrigui che rembirekópe. Ha upéi ave, ndajoguái amo impuésto kovrahápe. Ha upéva ári, ajapo ajúno mokõi ára pukukue peteĩ semánape, ha opa mba’égui ame’ẽ ndéve 10gui peteĩ.”

Pe impuésto kovraha katu oñemoha’eño mombyrymi, ha nda’ipy’ái voi ohupi haguã
hesa jepe yvága gotyo. Ha oinupã-nupã ipyti’a, ha he’i: “Ñandejára, che poriahuverekókena. Pekador niko che.”

Upéi Jesús ojere he’i umi chupe ohendúvape: — Umi mokõi ojevývo hógape, Ñandejára oheja rei pe impuésto kovrahápe umi hembiapo vaikue, pe fariséope katu nahániri. Umi ojejapo ha oñembotuicháva niko oñemomichĩ vaerã ágã, ha umi oñemomichĩva katu oñembotuicháne.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande aty vove lo mitã ndive ñañemongeta terere hápe oiko jepi mandu’a ñane irũre. Ha mbyky jakopi haguã umi ndaiporíva apére, jatalla ha japuka ñande rapicháre.
Pya’eve niko jahechakuaa ha ñamombe’u ñande rapicha ojavýramo, ha ñane mbegue jahecha ha ñamombe’u haguã ñane rembiapo vaikue.

Upéva rangue jaiporavo iporãnguete ñane mba’éva ñamombe’u haguã. Ha upéicha avei ikatu jajapo Ñandejára renondépe ha ñañembo’évo chupe, jaha ñañemoĩ porãse jareko’ỹramo guáicha mba’eveichagua ky’a ñande pype.

Hesu he’i ndaiporiha avave ikatúva oñembo’y Ñandejára renondépe ohecha kuaa’ỹre ha’eha pekador, ha rei ñañembotuichaseha henondépe. Pe ijáva ñandéve ha pe iporãva añete ha’e hina ñañemomichĩ ha jahechakuaa Ñandejára mba’e guasuha ha ñande katu hese’ỹ mba’evérõ guáicha.

Pe oñembotuichaséva Ñandejára renondépe oñemoĩsémane upéi ojeguaru hapichágui. Ha pe ojeruréva Ñandejárape toiporiahuvereko ichupe katu oiporiahuverekóne avei hapicha ojavývape.

He’i háicha San Bernardo: Pe kuimba’e reko porã ojekuaa tenonderã ha’e voi ohechakuaa rupi hembiapo vaikue, upéi oguerohory haguére Tupãme imba’e porãre, ha ipahápe katu omokyre’ỹre hapichápe tape porãre. Ha upéicha che irũ ha nde che reindy, ikatu ñañemboja hína Ñandejárare jerovia pópe. Ñane tĩndy ramo jepe ñanerembiapo vaikuetágui, imborayhu ñanemopu’ãne ha ñanemboguatáne py’aguapýpe.

Pa’i Alberto Luna.