Ñahendu Hesu. Viernes 12ª Tiempo Durante el Año

Escucha el evangelio y la reflexión en: https://youtu.be/ifZzZp0jVdo

Viernes 12º Durante el Año Mateo 8, 1 – 4

Upérõ oguejy Jesús pe sérrogui ha heta oñepyrũ oho hapykuéri. Oñemboja sapy’a hendápe peteĩ kuimba’e iléprava. Oñesũ henondépe ha he’i chupe: — Mbo’ehára, nde reipotárõ niko ikatu che monguera che mba’asýgui.

Jesús opoko hese ha he’i chupe: — Aipota. Ekuera.

Ha upepete ojei chugui imba’asy ha okuera. Jesús katu he’i chupe:— Ani mo’ãke emombe’u avavépe. Terehónte ejechauka pa’ípe. Eraha ne ofrénda Ñandejára peguarã ku Moisés he’i haguéicha. Péicharõ opavave oikuaáta rekueramaha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Jahecha ningo sapy’ánte ñande rapicha ikuru vaíva, imbara, ijaipáva ipirépe. Umíva ningo yma guare Hesu vallegua he’i vaekue osẽha pe tapicha retére hembiapo vai haguére.

Hyepýgui osẽ pe mba’e vai ipirére ojekuaáva, ha upévare umi leproso ikurupáva ipire, oñemosẽ va’ekue hóga ha itávagui, ndaikatúi oguahẽ hapichakuéra oime hárupi. Oñembo’yke ha mba’eve ramo guáicha ojeapo. Mombyry guive ojehecháramo ou, ojere ha okañýma ichugui opa ohasáva.

Oime niko ko’ãgaite peve ñande apytépe ñande rapicha ojererekóva umi leproso ojereko háicha Hesu tiémpope, ndojeapóiva mba’éramo, ojeréva ichugui opavave.

Umi ichapĩvéva, oikóva villa úlepe, umi tuja ha guaiguĩ ha’eño ha hasýva, umi hasýva sídagui, drogadicto, umi opytáva oke kállepe, préso kue, travesti, prostituta. Avei koróna vírugui hasýva, mombyrýguinte oñema’ẽ hese, ndojepokoséi ete voi.

Pe mba’asy ha mboriahu apĩ niko ijehegui voi ijetu’u, ha pe prójimo upérupi ohasáva oñandu ha ohecháramo hapichápe oñemohembe jeréva henondépe katu ipohyivéntema.

Hesu ndojeréi pe leproso-gui. Oja hese, ohendu ichupe ha oñe’ẽ hendive, opoko hese ha omonguera. Ha he’i ichupe oho haguã pa’i rendápe ha tupaópe opavave ohecha haguã okuera hague ha ikatu jeymaha oike hapicha kuéra apytépe, oho hógape ha ojeapo jevy máva ramo.

Papa Francisco ningo he’i ko ñane múndo ko’ãga guápe heta tapichápe oñemombo ytýramo guáicha, oñembotapykue voi mba’eve ndovaléiramo guáicha.

Umíva hína he’i Papa Francisco umi “descartado” kuéra. Ndaijáiva, hembýva, umíva peguarã ndaipóri aichejáranga. Mba’épa oñanduka ha oheja ndéve ko Hesu ojapóva pe lepróso ndive. Mba’eichaitépa ikatúne ñande ave, che reindy ha nde che irũ, ñamboguejy ñande rekovépe ko Hesu ñanembo’éva.

Pa’i Alberto Luna.