Ñahendu Hesu. Viernes 14ª Tiempo Durante el Año

Escucha el evangelio y la reflexión en: https://youtu.be/Y2xgRVRDyHY

Viernes 14º Durante el Año Mateo 10, 16 – 23

Upérõ Jesús he’i idisípulokuérape: Peikuaáke che pomondoha ovecháicha jaguarete kuápe. Pévare, peiko kuaa vaerã mbóicha, ha peñemomirĩ va’erã ku pykasúicha.

Peñangarekóke pende jehe. Cháke oĩta pende reraháva juezkuéra renondépe, ha peñembyepotíta itupao kuéra rupi. Ha che disípulo haguére peẽ, pejereraháta rréikuéra renondépe.

Peichahápe, pene mandu’áta chupekuéra ha umi hudio’ỹvape che rehe. Ha pene moĩ ramo hikuái mburuvicha kuéra pópe, ani pejepy’apy mba’épa pejéta térã mba’éichapa peñe’ẽta. Ku ija vove peẽme peñe’ẽ haguã, Ñandejára voi omoĩta pende jurúpe mba’épa pejéta. Ha ndaha’e mo’ãi voi peẽ peñe’ẽtava. Nahániri.

Ñandejára Espíritu pe oñe’ẽtava pende juru rupi.

Tyvýra ha teindýra opu’ãne ojuehe, ha peteĩ ome’ẽne ambuépe ojejuka haguã. Túva ha sy ome’ẽne ta’ýra térã imemby. Mitã katu opu’ãne túva ha sýre ha ojukaukáne. Che disípulo haguére peẽ, avave nda’ija’e mo’ãi pende rehe.

Che rehe ojeroviáva ipaha peve katu, oikovéta. Oĩ ramo pene muñáva peteĩ hendágui, tapehónte ambuépe. Añetéko ha’e peẽme. Ndapejapopái chéne pene rembiapo puéblokuéra Israelgua rupi, che Ñandejára Ra’y aju jey mboyve.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Hi’ã niko ñandéve opa mba’e jajapóva ojecháramo ha oñemomba’e guasu. Hi’ã avei ñandéve opavave ñanderayhu ha ñañemomorã. Ha katu jaikuaa hína ñande nameméi upéicha oikoha. Oĩ mante va’erã ombovaíva iporãramo jepe.

Hesu niko ñanemomarandúma va’ekue ñande jokuaiha ovecháicha aguara guasu apytépe. Oimetaha ndohayhúi ha ombovaíva ñande jerovia ha ñane rembiapo.

Oikuaauka ñandéve upéva ani haguã ñande pire ju’i. Ani ágã oĩ vove ipochýva ñane ndive jaiko haguére Ñandejára rapére ñasẽ ja’e: E’a che niko ndaikuaái kuri ha naimo’ãiete upeichataha raka’e. Avavete ko nomombe’úi chéve jaisu’u va’erãha irokuete avei Ñandejára rapére.

Hesu katu ningo ñandeavisa che irũ ha che reindy, ha ñanembojoja ovecháre. Ha upéva he’ise hína ñande ndajajeroviaiha mboka terã mbaretére, ndajajeroviái katuete ñe’ẽkuaa, arandu, térã katupyry ñandejehegui jarekóva rehe. Hesu irũicha ñamoĩ ñande rekove ha ñane rembiapo Ñandejára pópe, ha hesénte jajerovia.

Opáichavo pe Hesu irũ ikangýramo jepe, ndaitavýi hína. Mbóicha iletrádo va’erã, he’i ningo Kirito. Ha ohechakuaa va’erã mamópa oike ha mba’épa ikatúta ogueropu’aka ha omohu’ã. Ndaha’éi ku jajepoíva ha jajasurúvante oime háichante jahechahápe ndaikatu mo’ãiha ñasẽ porã.

Pa’i Alberto Luna.