Ñahendu Jesús. Martes 1º Tiempo Durante el Año

Escucha el evangelio y la reflexión en:

Martes 1º Tiempo Durante el Año Marcos 1, 21 – 28

Oguahẽ hikuái Cafarnaúmpe. Sábado árape Jesús oike tupaópe, ha oñepyrũ oporombo’e. Opavave ohecháramo joaite mba’éichapa ha’e ombo’e chupekuéra.

Jesús niko nombo’éi umi Moisés léi ombo’e háicha. Ha’e oporombo’e ku noikotevẽíramo guáicha avavére oporombo’e haguã. Ha upe judíokuéra tupaópe, oĩ peteĩ kuimba’e demóño poguýpe, ha upéva osapukái: Mba’ére piko reñemoĩ ore rehe, Jesús Nazaretgua? Reju piko ore rundívo?

Che roikuaa. Ndehína pe imarangatúva, Tupã omboúva.

Jesús oja’o pe espíritu añáme ha he’i chupe: Ekirirĩ ha esẽ pe kuimba’égui!

Pe Aña oityvyro mbarete pe kuimba’épe, ha osapukái hatãvo osẽ chugui. Opavave oñemondýi ha he’i joa ojupe: Mba’eichagua ñe’ẽ piko ãva? Oikuaa porãhápe ha mbaretépe ko kuimba’e he’i umi añáme osẽ haguã, ha ha’ekuéra ojapo ha’e he’íva! Pya’e voi herakuã Jesús opa rupi Galiléa jerekuévo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Heta niko oĩ oporombo’éva ha oñemoñe’ẽva. Hetáma ñahendu opredikáva ha odikurseáva. Heta mbo’ehára pórupima jahasa. Opáichavo nameméi umi ñe’ẽ ñahendúva opoko ha oguapýva ñande rehe. Oĩnte umi ñe’ẽ ñanemandu’áva ha ñañongatúva, umi ñanembo’éva ñande rekove rape ha ohesapéva ñande guata.

Jahecha Jesús oñepyrũ oporombo’e ha oñemoñe’ẽ Ñandejára rapére. Ha umi ohendúva chupe oñandu oñe’ẽha ipy’aite guive ha ndaha’éi umi ambue oñemoñe’ẽ vaicha. He’ívante he’i va’erãgui, ndaha’éi oñandú pypukugui pe he’íva. Ha mba’épa oiméne pe Jesús ñe’ẽ oreko, ajeve péicha oguapy umi ohendúvare.

Ha tenonderã pe Jesús ñe’ẽ ndaha’éi ñe’ẽ rei, ndaha’éi ijehegui reínte. Ndaha’éi iñakãme oúvante; ndahaéi, he’íva ku ñe’ẽnga, “juru ikuágui reínte oñe’ẽva”.

Jesús niko ohendu Ñandejára ñe’ẽ, ha’e oñembo’e. Ha pe Ñandejára Espíritu oguapy ipy’ápe upe ñe’ẽ rendu rupi. Ha upégui hoy’u upéi oñe’ẽ haguã hapichakuérape. Ha upéi ave Jesús oñe’ẽramo ndaha’éi ohekáva ojepopete térã oñembo’úrra chupe. Ojapo háicha umi odikurseáva concentración política hárupi.

Ha’e he’i pe añete guáva. Ombo’e tape ohayhúgui hapicha, oipe’aségui chupe pytũmbýgui hesakãhápe. Ehendu Jesús pe che irũ, iñe’ẽ nderesapéta rekañýramo che reindy, oipe’áta ndehegui kyhyje; nemombaretéta nekangýramo, ha nembopiro’ýta nekane’õramo.

Pa’i Alberto Luna.