Ñahendu Jesús Ñe’ẽ. Miércoles 3º de Cuaresma

Escucha el evangelio y la reflexión en: https://youtu.be/8KBXajZ2O0k

Miércoles 3º Cuaresma Mateo 5, 17 – 19

Upérõ Jesús he’i hemimbo’ekuérape: Ani peimo’ã che ajuha amboyke haguã Moisés mandamiénto, térã umi mba’e profétakuéra ombo’éva ymaite guive. Nahániri.

Ndajúi amboykévo umíva. Aju katu umíva ojehupa haguã hekoitépe. Añetéko ha’e peẽme. Yvága ha yvy oĩ aja, mba’evete asy ndojepe’a mo’ãi Moisés mandamiéntogui, ojehupa peve pe ipype oĩva.

Upévare, pe omboykéva Ñandejára mandamiénto ha ojapo’ỹva pe michĩvéva jepe, térã omboligáva hapichápe péicha ojapo haguã, upévata hína pe michĩvéva Ñandejára Rréinope. Ha pe Ñandejára mandamiénto ojapóva ha ombo’éva hapichápe katu, péva tuicháta hína Ñandejára Rréinope.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe ñande rogapýpe ñande jaikuaa heta mba’e: ñamba’apo va’erãha, ñañepytyvõ, ñañangareko michĩvévare, ñaneñe’ẽ rendu ñande ru ha ñande sýpe, jajorrespeta.

Ñamboja’o jarekóva, ñañomoĩ porã jey jaiko vai rire ñande rogagua ndive, ani jajavyky ndaha’éiva ñane mba’e, ñamopotĩ pe jaiporu va’ekue, jahechakuaa tekotevẽva jajapo oje’e mboyve ñandéve. Ñande ru ha ñande sy oñemoñe’ẽva ñandéve ha ñanerekombo’e ñamomba’e vaerãha Ñandejára ha Tupãsýme, ñañembo’e ha jaha haguã tupaópe.

Upéi katu jaju jakakuaa ha ñande jehegui ha sapy’ánte ñanderesarái ã mba’égui. Ñaimo’ã ñande jaikuaaha iporãvéva. Térã katu ñaneñe’ẽ rendu ambue ñande rapichápe ha ñamboyke ñande ypykue ñanembo’e va’ekue.

Jesús he’i ha’e ndoúi hague omboyke haguã umi 10 mandamiento Ñandejára ome’ẽ va’ekue ipuéblo Israélpe. Umíva ha’e simiénto Ñandejára omoĩ va’ekue upéi ou haguã Jesús omohu’ã. Ha péicha avei umi mba’e porã oñembo’e va’ekue ñandéve ñanemoĩva Ñandejára rapépe ha jeikokuaa ñande rapicha, ñande rogapy ha ñande komunida ndive, ha’e hína ñane simiénto, jaguerúva ñande ypykuégui. Umíva ári jakakuaa va’erã ha ñamopu’ã jahávo ñande rekove jaguatávo jerovia rapére.

Aipo ramo che reindy ha nde che irũ, ani rekyhyje eheja haguã Jesús oike nde rekovépe. Ha’e niko ndoúi oipe’ávo nde hegui umi mba’e porã erekómava, omoporãve ha ombochovi haguã nde rekove jehovaságui uvei.

Pa’i Alberto Luna.