Ñahendu Jesús Ñe’ẽ. Domingo 10ª Tiempo Durante el Año

Escucha el evangelio y la reflexión en: https://youtu.be/r0Thbrdp2Oo

Domingo 10º Durante el año Ciclo B                                                         

Marcos 3, 20 – 35.

Upérõ Jesús oho hógape, ha upépe oñembyaty jevy heta iterei, ha chuguikuéra ndaikatuvéi okaru jepe Jesús ha idisípulokuéra. Oikuaávo upéva Jesús hénte kuéra, oho ogueraha haguã chupe he’ígui hese noiporãiha iñakãme.

Uperõ Moisés léi mbo’ehakuéra oguahẽva’ekue Jerusaléngui he’i avei Jesús rehe: “Satana, añanguéra ruvicha voi niko hína pe ohejáva chupe omosẽ umi  añanguérape”. 

Jesús ohenói ha he’i chupekuéra ñe’ẽ mbojojápe: “Mba’éicha piko ikatúta Satana omosẽ Satanáme? Peteĩ tetã oñemboja’opáramo ha maymáva opu’ã oñoakãre, ndaikatúi upe tetã oiko arévo. Ha peteĩ óga pegua opu’ãmbáramo ojuehe oñehundi avei. Péicha avei, Sataná voi opu’ãrõ ijehe ndaikatu mo’ãi oiko arévo ha oikopáta hese.

Avave ndoike mo’ãi peteĩ kuimba’e imbaretéva rógape omonda haguã chupe, ndoipokuái ha ndoipykuái raẽirõ. Péicha ojapóramo mante ikatúne omonda chugui.

Añetehápe ha’e peẽme, Tupã oheja reitaha opavavépe opaichagua pekádo, ha oñeñe’ẽ vai haguére hese jepe. Espíritu Santo rehe ojahéivape katu ndojeheja rei chéne, opytáne hi’ári opa ára guarã.”

Ko’ã mba’e Jesús he’i, ha’ekuéra he’i haguére hese oĩha Aña poguýpe. Upe aja oguahẽ Jesús sy ha ityvýrakuéra. Opyta okápe ha ohenoika chupe. Umi oguapýva Jesús ykére he’i chupe: Nde sy, nde ryvykuéra ha umi ne reindy oime okapehína, nde reka. Jesús katu he’i: Mávaiko che sy ha máva che ryvy?

Upéi oma’ẽvo umi ijerére oguapývare he’i: Ko’ãva hína che sy. Ko’ãva che ryvy. Ha oimeraẽ ojapóva che Ru rembipota, upéva hína che ryvy, che reindy ha che sy.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

            “Ou vai vove, ou vaipa”. He’i lo mitã. Ha péicha jave jajere háguionte jajejopy: ñande rógape, ñamba’apo hápe, mba’asy, tekotevẽ, jeiko vai, kane’õ. Ndaipóri jurujái ha piro’y. Mba’eve ndaigústoi.

            He’i ningo San Alberto Hurtado, pa’i jesuita Chile gua: “Oguahẽ chéve sapy’ánte umi ára pohýi, nosẽiva chéve mba’eve, añeñapytĩmba vaicha. Che py’aropu. Ajere háguionte ndahechái tape. Ajejopy vai che kupe, che renonde ha che ykégui. Upéicha jave yvate gotyo mante ikatu asẽ. Ha ajesaupi Ñandejárape ahekávo pu’aka ha pytu’u.” 

            Jesús rehe jahecha avei oko’i ha ojerepa oikotevẽva. Ojopypa chupe, ojepoi hi’ári ha ndohejái chupe pa’ũ okarumi haguãnte jepe. Upéva apytépe hi’arivéntema ihéntekuéra jepe oñemoĩ oñe’ẽ vai hese ha he’íma katu hese itarovaha.

            Oiméramo okopi ha ojepopĩa’óva ñande apére, taha’e jepera’e ñande roguagua, ñañandúramo nañandepu’akái ha ñakañyha, ñanemandu’amínte Jesús avei ojejopy hague ñandéicha. Jajesaupi ñande ave yvate gotyo, jajerure Ñandejárape pe piro’y ñaikotevẽva, py’aguapýpe ñasẽ jey haguã tapépe mbeguekatu.

Pa’i Alberto Luna.