Ñahendu Jesús Ñe’ẽ. Jesús Korasõ Marangatu arete guasu

Escucha el evangelio y la reflexión en: https://youtu.be/YzXz7bZWKm8?si=q1aeWF-MWQ1PUesf

Jesús Korasõ Marangatu arete guasu

Juan 19, 31 – 37

Páskua ára arete mboyve upérõ, ha pytu’uha árata hína ko’ẽvo. Judío kuéra ndoipotái avave retekue opyta osãingo kurusúre upéva upe árape. Oho ojerure hikuái Pilátope ohetyma mopẽ haguã umi kurusúre osãingóvape pya’eve omano haguã hikuái, ha oñemboguejy haguã kurusúgui.

Umi soldádo oho ha ohetyma mopẽ umi mokõi osãingóva Jesús ykére. Oñembojávo Jesús rehe katu, ohecha hikuái omanóma hague. Upévare nohetyma mopẽi chupe hikuái. Peteĩva umi soldádo katu oikutu chupe ijyképe lánsape, ha upe ojekutu haguégui osẽ tuguy ha y.

Oĩ va’ekue peteĩ ohecháva ko’ã mba’e, ha ha’e omombe’u mba’épa ojehu upérõ. Ha añeteguánte upe omombe’úva ha ikatu perovia he’íva. Ko’ã mba’e niko péicha ou va’ekue ojehu oiko haguã ku Ñandejára Ñe’ẽme he’íva “Peteĩnte jepe ikãngue nomopẽiri chugui”. Ha Ñandejára Ñe’ẽme he’i avei “Omaña va’erã hikuái upe ojekutu va’ekuére”.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Peteĩ ryguasu ombyaty háicha imemby kuéra mimi ipépo guýpe, péicha avei chepombyatyse kuri che ykére, ha peẽ katu ndapeipotái.” Upéicha ndaje he’i Hesu oguahẽramo guare Jerusalénpe ha oñandúvo umi ivallegua irariha ichugui. Ha upérõ ndaje hasẽ raka’e Hesu.

Tuicha oguapy ikorasõre umi ivallegua nohenduseiha Ñandejára Ñe’ẽ ha ojetyvyro haguére ichugui. Upéicha avei ikatu ojehu ñandéve sapy’ánte heta ñañeha’ã rire ñamba’apo, jajeforsa, ñande rogagua, ñane hentekuéra térã ñane komunida rayhupápe.

Ñame’ẽmbaite rire ñande jehegui ikatumiha peve, jahayhúgui ichupekuéra, jaipotágui ohupyty iporãvéva. Ha upéi katu jaju jahecha mba’evérõ guáicha opyta upe ñane rembiapokue. Noñemomba’éi. Reiete váicha jagerrea.

Jesús katu ndoguevíri upe haguére. Ojopýramo jepe ichupe ikorasõme pe desprésio, ha tuicha oñembyasýramo jepe, ha’e norrenegái avave kóntrape, ha nosẽi pe ilíñogui. Opyta hykuerãme ha omboguata tenonderã pe misión Túva Ñandejára ome’ẽ va’ekue ichupe.

Ko árape che irũ ha che reindy jajesareko ha ñama’ẽ Hesu korasõre, hetaite huguy syry va’ekue tuichaite ñande rayhúgui. Ñamombe’u ichupe ñande avei umi mba’e ñanembosufríva, ñane ko’o ha ñanembohasýva, jajerure ichupe tañanembo’e jahupikuaa haguã pe ñande kurusu hendive.

ÑAÑEMBO’E OÑONDIVE

Ñandejára Jesukrísto, reme’ẽ mbaite va’ekue nde jehegui ha nereñongatúi va’ekue mba’eve nde jupe guarã. Orembo’emi ore avei roporohayhukuaa haguã ndéicha, romoirũ haguã umi ndéicha ohasa asývape ha ani haguã ore py’aro umi ore ndive iñañáva ndive. Amén.

Pa’i Alberto Luna.