Ñahendu Jesús Ñe’ẽ. Miércoles Semana 9° Tiempo Ordinario

Escucha el evangelio y la reflexión en: https://youtu.be/wvJE8zLeBko?si=D9RU-1OEEYZ14aag

Miércoles Semana 9° Tiempo Ordinario

Marcos 12, 18 – 27.

Upérõ oho Jesús rendápe umi saduséokuéra. Ha’e kuéra niko ndogueroviái omanóva
oikove jeyha. Ha oporandu hikuái Jesúspe:

— Mbo’ehára, Moisés niko he’i vaekue peteĩ kuimba’e omano ramo hembireko imemby’ỹre chugui, tyvýra omenda vaerã hembirekorére. Péicharõ pe kuña memby ypykue opyta upe omano vaekue ra’ýrõ. Oiko vaekue ndaje raka’e 7 kuimba’e ojoryvýva. Pe ijypykue omenda ha omano oheja’ỹre ta’ýra.

Upémarõ pe mokõiha omenda hembirekorére. Ha’e omano avei oheja’ỹre ta’ýra. Upéicha avei ojehu pe mbohapyhápe. Ha upéicha umi 7 omenda ojoapykuéri pe kuñáre oheja’ỹre ta’ýra. Amo ipahápe omano avei pe kuña. Néi, ág̃a ojeikove jey vove piko máva rembirekóta hína pe
kuña ko’ã 7 apytégui.

Jesús he’i chupekuéra: —Tuicha pejavy. Ha upéva ojehu peẽme ndapeikuaáigui Ñandejára Ñe’ẽ térã Tupã pu’aka. Ág̃a ojeikove jey vove, kuimba’e ha kuña nomenda mo’ã véima ojuehe. Oikóta hikuái Tupã ángelkuéraicha.

Ha ndaperoviaséi ramo omanóva oikove jeyha, piko ndapeikuaái nga’u Tupã he’i hague pe jukeri máta guive Moiséspe: “Chéko hína Abraham, Isaac ha Jacob Tupã.” Ha péicha jahecha Ñandejára ndaha’eiha omanóva Tupã. Ha’e niko Tupã oikovévape. Peẽ saduséo kuéra tuichaiterei
pejavy.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oĩ ningo he’íva: pe ñande rekovére ñañeha’ã vaerã jahupyty pe jaipotáva, javy’a ha jahasa porã, upe riregua ndajaikuaái oiménepa yvága, térã ñamano riregua.

Judío kuéra apytépe oĩ vaekue avei ndoroviáiva oĩha tekove ñamano riregua.

Hesu katu he’i ñande rekove ndosoiha ñamano rire. Ko ñande rekove Ñandejára ome’ẽva ñandéve, ha’e omoheñói vaekue ko yvy ári ita’ýra ha itajýraicha, ha omoirũva opa araite, ágã upéi ñamano rire ha’e omosã jeýta. Ndopoi mo’ãi ñande hegui, ndogue mo’ãi, térã ndopa rei mo’ãi ñande rekove. Umi iporãva jahasa ha jajapóva, ñañandúva ha ñañongatúva ñande py’ápe opytáta ñanendive opa ára guarã.

Hesu he’i ñande rekove ipyahutaha jahasa rire ñemano rupi. Ñaiméta Ñandejára ndive, ha’e ñanembyatýta, peteĩ túva ombyaty háicha tajýra ha ta’ýra kuérape imesa jerére oguapy haguã vy’ápe oñondivepa. Upépe ñanesãsóta jehasa asy ha jejopy vaígui.

Ko yvy ári hína che reindy ha nde che irũ, ñamoñepyrũ yvága. Ñañeprende hatãramo andejára Hesu ha Tupãsy póre. Iñe’ẽrendúpe ñamoañetévo mborayhu ñande rapicha ndive, ñe’ẽ porã, pytyvõ, poriahuvereko, tekojoja ha py’a porãme.

Upéicha tapére jahávo jahupytýma pe vy’a ha py’aguapy, ñambyaty estrella ojajái vaerãva ñande ári amo yvága ru’ãme.

Pa’i Alberto Luna.