Ñahendu Jesús Ñe’ẽ. Jesús Rete ára

Escucha el evangelio y la reflexión en: https://youtu.be/-baDgOGjKg8

Domingo Hesu Rete ára Ciclo B

Marcos 14, 12-16. 22-26

Pe arete oje’uhápe pan ilevadúra’ỹva ñepyrũha árape, ha ojejukahápe pe ovecha Páskua areterã, Jesús disípulokuéra oporandu chupe: — Moõiko reipota rombosako’i Páskua ñambyarete haguã.

Upévo Jesús omondo mokõi idisípulope, he’ívo: — Tapeho Jerusalénpe. Upépe pejuhúta peteĩ kuimba’e ogueraháva hína y kambuchípe.

Tapeho hapykuéri, oguãhẽ meve oikohápe. Pe óga járape peporandúta, “Ore mbo’ehára niko oporanduka ndéve erekópa peteĩ koty ikatutahápe ha’e ombyarete Páskua idisípulokuéra ndive.” Pe óga jára ohechaukáta peẽme peteĩ koty yvate oĩháme umi mba’e ñaikotevẽtava. Upépe pembosako’i ñandéve ja’u va’erã.

Idisípulo oho Jerusalénpe. Ha ojuhu hikuái Jesús he’i hagueichaite chupekuéra, ha ombosako’i hikuái upépe Páskua ombyarete haguã. Ha oĩ aja hikuái mesápe, Jesús ohupi ipópe pan, ohovasa ha oipehe’ã chupekuéra.

He’i: — Kóva niko che rete.

Upéi ohupi ipópe pe víno ryru ha ohovasa. Upéi ombohasa idisípulokuérape ha opavave ho’u chugui. He’i chupekuéra: — Kóva niko che ruguy, ha hese rupi Ñandejára ombopyahu iñe’ẽ peẽme. Kóva niko che ruguy oñeñohẽva heta rehehápe. Kóva hína ipaha ha’u pene ndive víno. Ágã Ñandejára Rréinope ñaime vove ja’úne víno pyahu.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ñande avío mante va’erã niko jahátaramo mombyry. Ajépa. Tekotevẽ ñande matúla mi reheve ñasẽ. Ani ñande pilapa ha japyta tapére.

Jesús niko oiméne ohechakuaa voi raka’e idisípulo kuéra ndaha’éi hína la imbarete etereíva ijeroviápe ha ijeheguínte ramo ipytupáta tapére ha nomohu’ã mo’ãi ijeguata.

Ñande ko avei che irũ ha che reindy ndaha’éi voi hína la ñande tíro puku etereítava Ñandejára rapére. Ha upévare ningo Hesu ombyaty ichupekuéra osena haguã oñondive. Ombojerovia imi chupekuéra, ohupi haguã mbarete tenonderã.

Pe Jesús rembi’u, Jesús rete, he’i va’ekue ha’e ja’u va’erãha, niko ñande avío hína, ñande matúla. Jesús ete voi oñemopeteĩva ñane ndive ha ñanemombaretéva. He’i avei Papa Francisco pe comunión ja’úva ndaha’éi hína ñanemba’e porã haguérente, péva ha’e avei pohã mbarete oipohãnóva umi hasy ha ikangýva Aña ponsóñagui.

ÑAÑEMBO’E OÑONDIVE

Rojerure ndéve Ñandejára Jesucristo ehupytyka haguã oréve pe avío ha’éva nde rete, rojoajúvo nde rehe ore pu’aka haguãicha opa mba’e vaíre ha orepohãno haguã opaichagua mba’asýgui. Amén.

Pa’i Alberto Luna.