Ñahendu Jesús Ñe’ẽ. Martes 8º Tiempo Durante el Año

Escucha el evangelio y la reflexión en: https://youtu.be/25It1leYV8o

Martes 8º Durante el Año Marcos 10, 28-31

Upérõ Pedro he’i Jesúspe: — Ore niko rohejapa opa mba’e ndéve romoirũ haguã.

Jesús he’i chupekuéra: — Añete ha’e peẽme, oĩ ramo ohejáva oimeraẽ mba’e che rehe ha Ñandejára marandu porã rehehápe, péva ohupytýta heta mba’e. Pe ohejáva hóga térã tyvýra, térã teindýra, túva, sy, hembireko, ita’ýra térã ijyvy, umi ohejáva rendaguépe
oñembojo’áta chupe 100 óga, tyvýra, teindýra, sy, ta’ýra ha yvy.

Oikove aja voi oñeme’ẽta chupe opa umi mba’e. Umíva pa’ũ rupi jepe ohasa asýta avei. Omano rire katu, ohupytýta jeikove opa’ỹva. Ha heta umi ko’ágã itenondéva, itapykuéta. Ha heta umi ko’ágã itapykuéva, itenondéta.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Mba’e piko ikuénta ñandéve jaha iterei tupaópe, jaiko ñembo’épe, mísa hápe ñañembyaty comunidápe, ñahendu Ñandejára ñe’ẽ umía. Ndofaltáiko péicha he’íva. Ha sapy’ánte katu oiméma voi ñane irûnguéra oguapyva hesekuéra ñe’e rei ha hi’ári ikane’ôva nosẽiramo tembiapo, ojuavyramo lo mitâ hamba’e, oúva ojepicha ha osê he’i: Mba’éiko chénte gua’u aiko hatã itereíta, añeha’ã ha amo ipahápe
ndojehechakuaái cheve mba’eve. Tajeheja mba’éna!

Jahecha mitã Pedro ou avei Jesús rendápe ha he’i chupe: Ore niko roheja ore róga, ore rembireko, ore rembiapo, roju haguã nde rapykuéri. Mba’e piko roligáta…

Jesús he’i chupe ani ombyasy hapykuéri ohejáva. Toma’ẽ hetaha iñirũ pyahu oñembyatýva, omoguahẽva chupekuéra hógape ha omongaruva ihénte ramo guáicha. Ha Ñandejára nombofaltaiha ichupekuéra mba’eve, ohasa asy ramo jepe sapy’a.

Noguahẽipa ndéve avei che irũ ha ndéve che reindy, sapy’ánte repensa mba’erãpa reñeha’ã iterei, eñembotapykue, nerembiapo porã, ndahekovia mo’ãi ramo ndéve.

Upe jave avei ikatu nepytyvõ ko Jesús he’íva: Mba’evete ñamboykéva Ñandejára rérape ha jajeroviágui hese jajapóva ndopyta mo’ãi hekovia’ỹre. Ko yvy árima voi hekoviáta ha upéi oñembojo’avéne ave ñandéve yvágape ñaguahẽvo.
Mba’etekópa péa. Mba’épa ere ichupe.

Pa’i Alberto Luna.