Ñahendu Jesús Ñe’ẽ. Domingo 30º Durante el Año

Escucha el evangelio y la reflexión en: https://youtu.be/sxi3mtWz8uY

Domingo 30 Durante el año Ciclo C Lucas 18, 9 -14

Upérõ ojapysaka hína Jesús rehe heta ojejapóva ha ojeroviáva ijehe ha oapo’íva hapichápe. ha Jesús omombe’u chupe kuéra kóva ko káso: “Oho ndaje tupaópe mokõi kuimba’e oñembo’évo. Peteĩva fariséo ha pe ambue katu impuésto kovraha. Pe fariséo oñembo’y ha oñembo’e kóicha: “Ñandejára, che aguyje ndéve na che mondáigui, nda che reko añáigui ha namyakãratĩrigui che rembirekópe. Ha upéi ave, ndajoguái amo impuésto kovrahápe. Ha upéva ári, ajapo ajúno mokõi ára pukukue peteĩ semánape, ha opa mba’égui ame’ẽ ndéve 10gui peteĩ.”

Pe impuésto kovraha katu oñemoha’eño mombyrymi, ha nda’ipy’ái voi ohupi haguã hesa jepe yvága gotyo. Ha oinupã-nupã ipyti’a, ha he’i: “Ñandejára, che poriahuverekókena. Pecador niko che.”

Upéi Jesús ojere he’i umi chupe ohendúvape: — Umi mokõi ojevývo hógape, Ñandejára oheja rei pe impuésto kovrahápe umi hembiapo vaikue, pe fariséope katu nahániri. Umi ojejapo ha oñembotuicháva niko oñemomichĩ vaerã ágã, ha umi oñemomichĩva katu oñembotuicháne.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

“Farmacia kuéicha nachepohãvéima”. Péicha lénto váicha oime ko tapicha impuésto kovraha itĩndýva Ñandejára renondépe. Mombyrymínte opyta. Ha’e oikuaa porã hína ifajutoha ha ndajái ichupe oñemomba’e guasu gua’u Ñandejára renondépe. Otĩ voi katu chugui. Ohechakuaa ñande rapicha ikuatia ky’aha py. Mba’étepa la hembýva ichupe. Ha ojerure Tupãme oiporiahuvereko haguã ichupe.

Péva rovái Jesús okasea ohoha avei peteĩ fariseo, tapicha itupao rayhúva ha ojapopáva hekópe umi mandamiénto he’i háicha. Ha upévare oiméne ojerovia ijehe.

Oimo’ã Ñandejára ohovasa mante va’erãha ichupe. Ha’éngo oimo’ã tuicha crédito ombyatýma hague Ñandejára báncope. Tenondete voi oho oñemoĩ. Oma’ẽ ykénte voi hapicha hembiapo vaívare, oñemohembe jere hovái. Ha osẽ Jesús he’i Ñandejára ndohovasái hague pe fariseo pe, oúva itĩ pu’ã ha oñemomba’e guasu henondépe, ha operdona hague pe yvýre oñemonávape, ojehechakuáagui mba’eichaguápa ha’e.

Mba’épa ere ichupe che reindy ha nde che irũ. Ha’ete ku aipóramo ndajajoguáiva pe Ñandejára gracia. Ha’ete ku ndaha’éi jajapopa haguére hekópe ñanerembiaporã ikatumaha jajerovia ñande jehe ha ñaimo’ãma ñandepojaitaha yvágare. Aníke aipóramo ñande jopi avei pe vícho ojopi va’ekue fariseo pe.

ÑAÑEMBO’E OÑONDIVE

Ñandejára Jesucristo, nde niko eguejy yvágagui ha eñemomichĩvo ehechauka oréve tape añeteguáva. Aníkena eheja rojavy ha roñemomba’eguasu avave renondépe. Toroñemoĩ uvei ore rapicha ykére. Amén.

Pa’i Jasy.