Ñahendu Jesús Ñe’ẽ. Sábado 29º Durante el Año

Escucha el evangelio y la reflexión en: https://youtu.be/Hy5MGZ6e7-U

Sábado 29 Durante el Año Lucas 13, 1 – 9

Upérõ oñemombe’u Jesúspe Pilato ojukayka hague heta Galileaguápe. Ko’ã kuimba’e niko ojejuka tupaópe, iñofrénda oikuave’ẽ jave hikuái Ñandejárape. Jesús osẽ he’i: Peimo’ã nga’u piko peẽ, umíva ojejuka hague iñangaipa hetave haguére hapichakuéragui. Nahániri. Ha peẽ voi ndapejevýirõ Ñandejára gotyo, pemanótante avei.

Pene mandu’ápa umi 18 omano va’ekuére ho’árõ guare hi’árikuéra pe tórre Siloépe. Peimo’ã piko péicha ojehu hague chupekuéra hembiapo vaive haguére hapichakuéra Jerusalenguágui. Nahániri. Ha peẽ voi ndapejevýirõ Ñandejára gotyo, pemanótante avei.

Jesús omombe’u chupekuéra kóva ko káso: Peteĩ kuimba’e ndaje oguereko raka’e peteĩ ígo máta iparraltýpe. Peteĩ ára, oho ohecha hi’ápa, ha ndojuhúi hese mba’eve.

Upépe osẽ he’i ikapatápe: mbohapy áño háma aju ahecha hína ko ígopa hi’a, ha mba’eve ndajuhúi. Eity ñandéve. Oĩ reíma hína ko’ápe.’ Pe kapata katu he’i chupe: ‘Karai, jahejántena gueteri peteĩ áño. Ahapyatýta ñandéve ha ambyavevo porãta pe yvy ijerére. Ágã hi’a ramo jaheja. Nahánirirõ katu jaity.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Sapy’ánte jatopa umi okakuaa porãva ha otyarõmbámava, hesãiva ha oĩmava omba’apo haguãicha, ha mba’eve guasu ideprovechóva ndojapói. Ha’ete ku okaru ha okévonte oiméva ha ndojapóiva iporãva avavépe, ndaha’éirõ ijupe guarã año. Oĩ avei umi oñeha’arõva ichugui tuicha mba’e ha ha’e kuéra katu nome’ẽmbái upe ikatu háicha.

Oñongatu vaicha, ku vaka ohupi háicha ikamby ani haguã oñeñamimba. Ha umíva renondépe ikatu ja’e: Maerã piko jareko ãichagua tapicha oime reíva ñanáicha ñande apytépe. Okambu haguãnte oikóva ha nome’ẽiva avavépe mba’eve.

Jesús he’i Ñandejára ome’ẽha ñandéve mba’épepa ñande katupyry ñame’ẽ haguã upe ha’e oha’arõva ñande hegui. Ha ñande rapicha kuéra avei oha’arõva ñame’ẽ ñande jehegui. Ñande deprovecho haguã ñande rógape, ñande komunidápe, ñande Iglésiape, ñane retãme. Ha ipaciéncia ñande rehe Ñandejára. Nañandedeprovécho guasúiramo jepe ome’ẽ ñandéve changui, ombopukuve imi ñande rape. Omoĩ ñande ykére tapicha ikatúva ñane pytyvõ, ñanembo’e va’erãva ha oipe’áva ñande hegui umi ñande jokóva.

Mba’eve nde’iséi hína, che reindy ha nde che irũ, jaikove puku térã ñamano voíramo. Ñandejára tojevale ko ñande rekovemígui ha tañandedeprovécho ñande rapichápe hína la he’iséva.

Pa’i Jasy.