Ñahendu Jesús Ñe’ẽ. San Lucas ára

Escucha el evangelio y la reflexión en: https://youtu.be/9tWTaatLerk

18 octubre: San Lucas ára

Lucas 10, 1-9

Upérõ Jesús oiporavove 72 idisipulorã ha umívape omondo henonderã, mokõi-mokõi, puebloha rupi hamba’e, umi ha’e ohasataha rupi. He’i chupekuéra: Ajépa tuicha pe Ñandejára kokue ha heta hi’a, omono’õ va’erãnte mbovy.

Upévare, pejerure Ñandejárape tombohetave umi ou va’erãva omyerakuã pe marandu porã opavavépe. Tapeho peẽ. Peikuaáke pomondoha hína ku ovecháicha jaguaretekuápe. Ani peraha pláta térã pende avíorã térã pende py rehegua ave. Ani avavépe pemomaitei tapére.

Oimérõ pene mog̃uahẽva hógape, pya’ete pemomaitei pejévo “Ñandejára rérape ta peime porãmba, ha py’a guapy toĩ pene ndive.” Ha oiko ramo hikuái py’a guapýpe, pene ñembo’e ohovasáne chupekuéra. Nahánirirõ katu, peẽme jeýnte opytáne. Ani peiko peva-peva rei óga-ógagui. Pepyta upe peg̃uahẽháme ha pe’u upe oñeme’ẽva peẽme. Omba’apóvape niko ija ohupyty hembiapo repykue. Peike ramo peteĩ puéblope ha pene mog̃uahẽ porã ramo hikuái, pe’u umi mba’e oñeme’ẽva peẽme. Pemonguera opa hasýva ha peje chupekuéra Ñandejára Rréino hi’aguĩmaha.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe iñarandu ha ijestúdiovape niko lo mitã ombojerovia ha oreko karai guasu ha kuñakarai guasúramo. “La tavy ningo nañandejukái, ñande reko asýnte”, he’i ningo ñe’ẽ. Ha upévare oime he’íva ifamíliape ostudia haguã ani haguã oiko asy upéi. Ko árape ñanemandu’a hína San Lucas re. Ha’e niko peteĩ karai arandu va’ekue.

Médico raka’e, he’i ningo hese San Pablo (Col. 4,4). San Lucas niko omombe’u va’ekue Jesús rekove. Ombyaty raka’e heta káso ha kuatia omombe’úva Jesús rekove, omohenda, omyesakã ha omboguapy kuatiáre, ohejávo ñandéve pe “Evangelio San Lucas” rembiapokuéva. Ha ombojoapy upéi “Apóstol kuéra rembiapokue” -Hechos de los apóstoles- omombe’úva umi cristiano ypykue rekove ha hembiasa Jesús omano rire.

Ha péva ningo tuicha ñanepytyvõ ñandéve jaikuaa porãve haguã heta mba’e Jesúsrekove, iñe’ẽ ha hemimbo’e rehegua. Hese’ỹ ikatu va’erã mo’ã okañy ñande hegui.

Umi mba’e jahecha ramóva Lucas kuatiápe hína mba’éichapa Jesús oñembojoja ñanendive. Lucas hína pe omombe’uvéva ñandéve Jesús imitãramo guare ha mba’e. Avei omombe’u oime hague kuñanguéra omoirũ ha oguatáva Jesús ndive, disípulakuéra. Ha avei Lucas ombyaty umi káso Jesús ñanembo’e hápe mba’eichaite pevépa Ñandejára ñanderayhu ha ñandeporiahuvereko.

Opaichagua tapicha niko Jesús ombyaty ha ojokuái. Umi mboriahu ha itavymíva la ijatyvéva ijerére. Opáichavo oime avei iñarandu ha ijestúdiova, oiporúva pe katupyry ha mba’ekuaa omoguahẽ haguã hapichápe Ñandejára ñe’ẽ ha imborayhu.

Pa’i Alberto Luna.