Ñahendu Jesús Ñe’ẽ. Sábado 28º Durante el Año

Escucha el evangelio y la reflexión en: https://youtu.be/q7x-LUI_-YI

Sábado 28º Durante el Año Lucas 12, 8 – 12

Upérõ Jesús he’i idisípulokuérape: Peẽ peje ramo oimeraẽvape pejeroviaha che rehe, che amombe’úta Ñandejára ángelkuérape, peẽ che mba’eha. Ha oimérõ he’íva nda che kuaaiha katu, che ave ha’éne Ñandejára ángelkuérape peẽ ndaha’eiha che mba’e.

Che rehe peñe’ẽ vai ramo, Ñandejára oheja rei kuaáta peẽme upéva. Espíritu Santo rehe peñe’ẽ vaírõ katu, Ñandejára ndoheja rei mo’ãi peẽme upéva.

Ág̃a pene moĩvo hikuái karai ha poguasu kuéra renondépe téra karai juez rovake, ani pejepy’apy mba’épa pejéta pende jehe. Og̃uahẽvo peẽme peñe’ẽ hag̃ua, Espíritu Santo he’íta peẽme mba’e-mba’épa peje va’erã.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

He’i ningo upérupi lo mitã umi oikoitereíva tupaópe isantulárioha. Oĩma katu ojeheróva ha oñemomarkánte “anguja tupao” térã katu “pa’i mbarakaja ha mba’e”. Ha umíva ningo oje’éva ojetalla haguã, ñe’ẽ reitýpe ha pukarã ijatyhápe lo mitã upérupi, ñe’ẽ mbeguépe jahasakuévo oñehenduka.

Oĩ voi katu ningo ñande rovaitépe oúva ñande rape joko haguã he’ívo: “Mba’e piko la renohẽtava upérupi reikóvo, neremboapu’ái ningo mba’eve. Mba’e ventaja piko rehupyty. Ejehejána umívagui”, ha mba’e. Ha upéva oiko jepi ñande rógape voi. Sapy’ánte katu ñamba’apo hápe, ñane vecinokuéra, térã katu ñane héntekuéra apytépe ha mba’e. Ha umícha sapy’ánte jajúma ñatĩ ñamombe’u haguã ñande jajeroviaha Ñandejárare, jaguataha comunidad pe, grupo térã movimiento tupao guápe ha mba’e.

Jesús he’i idisípulokuérape ani haguã otĩ he’i haguã ojeroviaha hese avave renondépe. Ani okyhyje ojetalláramo guarã hese kuéra ha ojeraháramo guarã mburuvicha ha juez kuéra renondépe jepe. Espíritu Santo ome’ẽta pu’aka ha omoĩta ñe’ẽ arandu ijurúpe ombohovái haguã opa umíva, he’i Jesús.

Oime ningo ñande rapicha cristiano ambue tetãgua, católico térã evangélico ojereraháva kárselpe he’i haguére ojeroviaha Jesús re. Térã katu oñemuñáva, oñembo’itáva, ojejukáva, ojehapýva itupao térã hóga kuéra Jesús réra omoherakuã haguére. Ñane retãme jepe niko, Stroessner tiémpope, heta ñande rapicha cristiano campesino ohasa asy ha ojeapresa va’ekue oĩ haguére Líga Agraria Cristiana pe.

Ñane kangy imi vove ñande guatápe che irũ ha che reindy, ha jakyhyje vove ja’e haguã ñande rapicha renondépe ñande ha’eha Jesús rehegua, iporã ñane mandu’a ko’ã ñande rapicháre ogueropu’akáva kurusu pohýi Ñandejára rayhupápe.

Upéicha ikatúne ñande ave ñandepy’a guasu imive ñamoĩ haguã ñande rova, ñati’ỹre Ñandejáragui ha ja’e haguã jajeroviaha hese oimeraẽva rovake.

Pa’i Jasy.