Ñahendu Jesús Ñe’ẽ. San Pedro guapyha ára

Escucha el evangelio y la reflexión en: https://youtu.be/Xy7zWLIOQkY

22 febrero: San Pedro guapyha ára Mateo 16, 13-19

Upérõ Jesús oguãhẽmbotávoma Cesaréa Filípope, oporandu idisípulokuérape:— Mba’éiko oje’e che rehe upe rupi. Mavaha che piko he’i hikuái.

He’i chupe hikuái:— Oĩ he’íva nde rehe, nde Juan Bautistaha. Oĩ katu he’íva ndeha Elías, ha oĩ ave he’íva ndeha Jeremías térã ambue proféta.

Jesús oporandu chupekuéra: — Ha peẽ piko mba’e peje. Mávaiko che.

Ha Simón Pedro he’i chupe: — Nde hína pe Mesías, Ñandejára oikovéva Ra’y.

Jesús he’i chupe:— Ñandejára ta nde rovasa ndéve Simón. Ndejeheguínte ndereikuaái vaerã mo’ãi kuri péva, che ru yvagapegua ndoikuaaukái rire ndéve. Ha ha’eve ndéve Pedro, nde réra niko he’ise ita.

Ko ita ári amopu’ãta che iglésia, ha mano jepe nda’ipu’aka mo’ãi hese. Nde pópe amoĩta Ñandejára Rréino rokẽ reipe’a haguã. Ha opa mba’e nde emosãva ko yvy ári oñemosãta avei yvágape. Ha opa mba’e nde reheja reíva ko yvy ári, yvágape avei ojeheja reíta.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Oime niko amo Rrómape karai Papa. Upéva ymaite guive oime hína upépe San Pedro rekovia. Ha la San Pedro niko oho vaekue Rrómape ha ojejuka raka’e upépe.

Oñemosaingo kurusúre oakãvo, ome’ẽ hekove imaéstro ojapo haguéicha. Ñandejára Jesucristo ite voi niko raka’e oheja San Pédrope omyakã ha omopyenda haguã ñande Iglesia.

Simón ningo ha’e la héra ypy, ha Jesús ou raka’e omoĩ ichupe héra pyahu itáicha. Pedro ningo he’ise ita. Ha upéva upe ita ári hína Jesucristo he’i raka’e oñemopu’ãtaha pe Iglesia marangatu ha’e omoñepyrũ va’ekue ko yvy apére. Ha la San Pedro ojejuka rire niko hetáma ojeporavo hekoviarã Rrómape.

Upe guive oipytyvõ, ohekombo’e ha omoirũ haguã Ñandejára rapére umi Jesucristo rehe ojeroviáva pe. “Papa” ningo he’ise “túva” Rróma ñe’ẽme, oiméva ñande Katóliko peguarã ñande ru ramo, ñanembo’éva Hesu rape, iñe’ẽ ha hembiapo rupive.

Mokõi Papa oúma kuri ñane retãme. Juan Pablo II ou va’ekue áño 1988 pe. Stroessner okúi ha oñemosẽ mboyvemi. Upéi ou Papa Francisco, año 2015 pe. Heta mba’e porã ñanembo’e vaekue ko’ã karai marangatu, San Pedro rekovia ha Ñandejára Jesucristo rembijokuái. Mba’épa ere, che irũ ha che reindy, ko árape ñanemandu’ami haguã ñande Papa rehe ñane ñembo’épe. Sapyánteko ohasa asy avei ha’ekuéra.

Ndaha’éiko opavave ohayhu ha ojepopetéva ichupe kuéra. Oime avei ndoikuaaséiva ichugui mba’eve ha omosaingoséva kurusúre oakãvo, San Pédrore ojejapo haguéicha.

Pa’i Alberto Luna.