VIERNES SEMANA XXX TO

Ñahendúta Tupã Ñandejára Ñe’ẽ San Pablo ohai va’ekue Filipos guápe                                             

     1, 1-11

Che Pablo ha Timoteo, Cristo Jesús rembiguái, pomo maitei opa umi Tupã Ñandejára mba’éva táva Filipos guápe, ojoajúva Cristo Jesús rehe, ha avei opa umi omoakãva pende aty ha ipytyvõhára kuérape. Tupã ñande Ru ha Ñandejára Jesucristo to hekuavo hemime’ẽ ha ipy’aguapy pende ári.

Che mandu’a vove pende rehe ame’ẽ che aguyje  Tupã che Járape, ha añembo’évo, katu ete ajerure vy’apópe pende rehe, ñamba’apo va’ekue  niko oñondive marandu porã ñemoerakuãme, iñepyrũha guive ko’ágä  ite peve. Aikuaa porã Tupã Ñandejára, omoñepyrũ va’ekue  hembiapo pende pype, omoguahẽtaha hu’ãme Jesucristo ou jevyha ára peve.

Hekopete aha’arõ upéicha pende hegui, poguerekógui che py’a rugua itépe, ha peẽ pehupity haguére che ndive pe py’a porã Tupã Ñandejára ohechauka va’ekue  chéve, ta ha’e aimérõ koty ypytũme térã mburuvicha kuéra renondépe añe’ẽ haguã marandu porã rehehápe.

Tupã Ñandejára oikuaa mba’éicha itépa pohecha ga’u opavavépe, Cristo Jesús niko omoĩ che pype pohayhu haguã che py’a ite guive. Añembo’érõ ajerure imborayhu to kakuaave ohóvo, ha Tupã Ñandejára to me’ẽ peẽme mba’e kuaa ha arandu, peiporavo tapia haguã pe iporãvéva. Upéicha ikatúta pende reko potĩ ha peguata tenonde peñepysãnga’ỹre. Cristo ou jevyha ára peve. Peẽ niko peraháta pende po renyhẽte tembiapo porã, Jesucristo rupi, Tupã Ñandejára ojererohory ha oñemomba’e guasu haguã.

Tupã Ñandejára Ñe’ẽ.

SALMO ÑEMBOHOVÁI      110, 1-6

R. Tupä Ñandejára rembiapokue iporã ha omimbipa.

Che py’a ite guive arohory Tupä Ñandejárape,

aty guasu ha heko jojáva atyhápe.

Tuicháko hína umi Tupä Ñandejára rembiapokue,

ha umi oguerojepy’a mongeta hese. R.

Tupä Ñandejára rembiapokue iporã ha omimbipa,

ha’e heko joja opa ára.

Mba’e hechapyrãva ojapo ha umívagui ndoikói tesarái.

Tupä Ñandejára ipy’a porã ha oporohecha kuaa. R.

Ha’e omongaru umi hese ojeroviávape,

ha opa ára imandu’a iñe’ẽ ome’ẽ va’ekuére.

Hetã guápe ohechauka hembiapo imbareteha,

ome’ẽvo ichupekuéra ambue tetã yvy. R.

ALELUIA Jn 10, 27

Aleluia.

Ñandejára Jesucristo he’i:

“Che ovecha kuéra ohendu che ñe’ë.

Che aikuaa ichupekuéra ha ha’e kuéra oho che rapykuéri.

Aleluia.

EVANGELIO

Ko’ágä   ñahendúta Ñandejára Jesucristo rekove ha hemimbo’e San Lucas omombe’u háicha. Pejapysaka porãtapa hese?                                                     14, 1-6

Upe ramo peteĩ pytu’uha árape, Jesús oho okarúvo peteĩ fariséo ruvicha rógape. Ha okáguio umi fariséo oma’ẽ ñemi hese. Oĩ avei upépe, henondépe, peteĩ karia’y hasýva, ijyva ha hetyma rurupáva. Jesús oporandu umi Moisés rembiapoukapy mbo’eha ha umi Fariséope:

Ikatúpa oñemonguera peteĩ hasýva pytu’uha árape, térãpa nahániri?

Ha’e kuéra katu opyta okirirĩ. Aipórõ ha’e omonguera upe hasývape ha he’i ichupe oho haguã. Ha umi Fariséope he’i:

Mávapa pende apytépe, ita’ýra térã hymba guéi ho’árõ yvykuápe, pya’e ndohói oguenohẽ, pytu’uha ára ramo jepe?

Ha ndaikatúi he’i hikuái ichupe mba’eve.

Ñandejára Jesucristo Ñe’ẽ.