Ñahendu Jesús Ñe’ẽ. Domingo 4° de Adviento

Escucha el evangelio y la reflexión en: https://youtu.be/Cq51bfcWgvM

Domingo 4° de Adviento Ciclo A Mateo 1, 18-24

Jesucristo oúramo guare kóicha va’ekue: Isy María ome’ẽma iñe’ẽ omenda haguã Josére. Ha oiko mboyve oñondive, María ojejuhu hye guasuha Espíritu Santo rupi. José katu, kuimba’e ijohei pyréva, nomoherakuã vaiséi chupe.

Oheja reise mo’ãnte chupe, avave oikuaa’ỹre. Ko’ã mba’e ombojere aja iñakãme, ojehechauka chupe iképe peteĩ Ángel, ha he’i chupe: José, David ñemoñare, ani rekyhyje reraha haguã ne rembirekorã Maríape. Pe mitã ha’e oguerekótava niko Espíritu Santo pu’aka rupi ou. María imembýta ha rembohérata pe mitã Jesús. Ha’e hína osalváta tetã Israel.

Ko’ã mba’e ojehu oiko haguã hekoitépe upe Ñandejára he’iva’ekue proféta rupi: “Kuñataĩ imarã’ỹva hye guasúta ha imemby kuimba’éta. Oñembohérata Emanuel, he’iséva “Tupã oĩ ñane ndive”.

José opáyvo, ojapo pe Ángel he’i haguéicha chupe, ha ogueraha María hógape hembirekorã.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Tembiapo guasu ñamoñepyrũta vove ndajajerovia guasúi mitã pyahúre, mitãkuña rehe, ha ilápi mbykymíva rehe. Jaiporavo jepi omyakã haguã iñarandumíva, ykatupyryvéva, jajepokãve otyarõmava rehe ha oñe’ẽ kuaáva mburuvichakuéra ndive.

Ha jahecha Ñandejára ombohape vove Jesús jeju, ndaha’éi ñandéicha oñandúva. Ha’e ndoiporavói karai guasu otyarõva. Oho oiporavo peteĩ mitãkuña pyahu, oikóva peteĩ pueblo’ípe ha imenarã peteĩ carpintero, oikóva amo campaña ruguáre.

Ñande Obispo kuéra tetã guasu América Latina gua niko yma guive he’i oikóvo ñande Iglésia pe ñamotenonde va’erãha imboriahúva. Upéva ha’e hína pe “opción preferencial por los pobres” oje’éva. Ha ñanembo’e hikuái avei ñamotenonde va’erãha mitãkuña ha mitãkuimba’e pyahu, peva hína “opción preferencial por los jóvenes”.

Ñahendu kuri José oduda hague hembirekorã María gui hyeguasúmava ha ndaha’éi ichugui. Ha iképe pe Angel he’i chupe pe mitã ha’eha Ñandejára remimbou, ha omenda haguã María re. Ha José ndojapói ha’e ohecha ha oñandu háicha. Ojerovia, iñe’ẽ rendu ha ojapo ipahápe pe Ñandejára he’iukáva ichupe.

Mba’eichaitépa ñande avei che irũ ha che reindy ikatúne ko Navidad pe jajapo upe Ñandejára ohechaukáva ñandéve José rupive. Ha’e ohayhu ha oiporavóva hapicha kuña mboriahu, opytáva ijykére ha oñangarekóva hese ha imembýre, ndopoíriva ichugui, noñembotavýi ha ndoheja reíri.

ÑAÑEMBO’E OÑONDIVE

Ñandejára ore Ru, nde niko reiporavo María pe, mitãkuña pyahu mboriahu, nde ra’y Jesucristo syrã. Orembo’emína ore Iglesia pe romotenonde haguã umi imboriahúva ha roñangareko haguã mitãkuña ha mitãkuimba’e rehe. Amén.

Pa’i Jasy.