Ñahendu Jesús Ñe’ẽ. Domingo IV de Cuaresma

Escucha el evangelio y la reflexión en: https://youtu.be/fE6nBGmdkOs

Domingo IV Cuaresma. Ciclo A Juan 9, 1. 6-13. 16-17. 34-38.

Jesús oguata jave ohóvo, ohecha sapy’a peteĩ ohecha’ỹvape onase guive voi. Upépe Jesús ojapo tuju hendýpe ha omona pe ohecha’ỹva resáre.

Upéi he’i chupe: — Tereho ejovahéi ykua Siloépe.

Pe ohecha’ỹva oho ha ojovahéi Siloépe, (hudíokuéra ñe’ẽme he’iséva temimbou), ha ou ojeývo katu ohecháma.

Umi hóga jere rupi oiko vaekue ha umi ohechámi va’ekue chupe ojerurévo oikóvo ho’u vaerã
opa rupi rei, ohecha chupe. Ha he’i hikuái: — Péva piko ndaha’éi ku jahechámiva upe rupi
oguapýva ha ojeruréva ho’u va’erã.

Oĩ he’íva: — Hẽe, ha’e.

Oĩ katu he’íva: — Nahániri, ndaha’éi. Ijoguahánte.

Pe kuimba’e katu he’i: — Che hína upéva.

Upépe oporandu chupe hikuái: — Ha mba’eichakue piko ko’ág̃a reju rehecha.

Ha he’i chupekuéra ha’e: — Ku Jesús hérava ojapo tuju, omona che resáre ha he’i chéve: “Tereho ejovahéi ykua Siloépe”. Ha aha upépe, ha ajovaheipa rire ahecha.

Oporandu chupe hikuái: — Ha moõiko oime ha’e.
Ha’e he’i chupekuéra: — Ndaikuaái.

Oĩ ogueraháva pe ohecha’ỹ va’ekuépe fariséokuéra rendápe.

Oĩ fariséo he’íva: — Péicha ojapóva niko ndoúi Ñandejáragui. Mba’éicha piko aipo pytu’uha árape péicha ojapóta.
Oĩ katu he’íva: — Pekador piko araka’e ojapóva milágro.
Ha ojoavypa hikuái oñondive. Upéi katu oporandu jey voi hikuái pe ohecha’ỹ va’ekuépe:
— Ndéve niko ne monguera. Mba’e ere hese.
He’i ha’e: — Chéverõ g̃uarã, ha’e proféta.

Upépe he’i chupe hikuái: — Nde, pekádo memetéva renase guive, piko rejúta ko’ápe ore reko mbo’ese. Eguatáke tereho águi, ha ani mo’ãke ejuve.

Upéi Jesús ohendu oñemosẽ hague. Ha ojuhúvo, he’i chupe: — Ndéiko rejerovia Ñandejára Ra’ýre.

He’i ha’e: — Ere chéve mávapa, ha ajeroviáta hese.
Jesús he’i chupe: — Remaña hese hína. Che niko upéva, ko ne ndive oñe’ẽva.
Upépe, pe kuimba’e oñesũ Jesús renondépe, ha he’i chupe: — Ajerovia nde rehe che Jára.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Ndajajeroviái peve Hesu rehe che irũ ha nde che reindy, pytũmbýpe jaiko, ñane resatũ, vaicha jahecháramo jepe opa mba’e. Ñakañy ndajahejái peve ha’e ñande resape’a ha ohechauka ñandéve tekove añete rape.

ÑAÑEMBO’EMÍNA

Ñandejára Hesukrísto. Rehecháva hína mba’éichapa rokañy javoráipe. Ejumína ndete epoko ore rehe, eipe’a ore resa, rosẽ haguã pytũmby ha opa mba’e vaígui. Roguata haguã hesakã hárupi, py’aguapy ha mborayhu rapére, nendive ha ore rapichakuéra ndive. Amén.

Pa’i Alberto Luna.