Ñahendu Jesús Ñe’ẽ. Domingo 2º Pascua

Escucha el evangelio y la reflexión en: https://youtu.be/w3S9u4GBBZs

DOMINGO 2º PASCUA Juan 20, 19 – 31

Umi Jesús disípulo okyhyjégui umi judíokuéra ruvichágui oñembyaty peteĩ koty ñembotypýpe. Ha upe Domíngo pyhare voi, Jesús ou sapy’a oñemoĩ mbytépekuéra. Omomaitei chupekuéra he’ívo: — Ta pende py’aguapy joaitéke.

Upéva he’ipávo, ohechauka chupe kuéra umi ipo ha pe ijyke ojekutu hague. Tuicha ovy’a hikuái ohechávo Ñandejára Jesucrístope. Upéi katu Jesús omomaitei jey voi chupe kuéra: — Py’aguapy toĩ pene ndive. Che Ru che mbou haguéicha, che pomondo peẽme.

Upévo, oipeju hesekuéra ha he’i: — Ame’ẽ peẽme Espíritu Santo. Oimeraẽvape peẽ peperdonáva ipecádo, Ñandejára ave operdonáta chupe. Ha napeperdonái ramo katu, Ñandejára ave noperdona mo’ãi chupe.

Tomás, ku Jesús disípulo Gemelo ojeheróva, niko noĩri va’ekue Jesús ojechauka ramo guare idisípulokuérape. Upéi umi Jesús disípulo he’i Tomáspe: — Rohecha niko Ñandejára Jesucrístope.

Tomás osẽ he’i chupe kuéra: — Ndahechái ramo ipóre umi klávo kuare, ha namoingéi ramo che kuã umi ikuarépe ha pe ijyke ojekutu haguépe, ndarovia mo’ãi.

Upe rire, 8 ára haguépe, Jesús disípulo kuéra oñembyaty jeýma hikuái peteĩ ógape, ha Tomás oĩ upépe. Umi okẽ hamba’e oñembotypa. Peichaháguinte, Jesús oike sapy’a ha oñemoĩ mbytépekuéra.

Omomaitei chupekuéra, he’ívo: — Ta pende py’aguapy joaitéke.

Upéi osẽ he’i Tomáspe: — Emoinge ápe ne kuã ha ema’ẽ che póre. Eru nde po ha emoinge ko che yképe. Anive reduda. Eguerovia.

Upépe Tomás he’i: — Nde niko Tupã ha che Jára.

Jesús he’i chupe: — Che recha haguérente piko rerovia. Ovy’aite va’erãnepa ágã umi che rehecha’ỹre ogueroviáva.

Opaichagua milágro niko Jesús ojapo idisípulokuéra renondépe. Heta umíva noñemoĩri ko kuatiápe.

Umi ko’ápe oĩva katu niko oñemoĩ peguerovia haguã peẽ Jesús ha’eha pe Mesías, Ñandejára Ra’y, ha hese pejeroviárõ perekóta tekove opa’ỹva.

Ñandejára Jesucristo Ñe’ẽ.

ÑAMBOGUEJY ÑANDE REKOVÉPE

“Ndakuérai ninamanói” he’i ningo peteĩ purahéi. Ha péichako jaiko sapy’ánte ñande. Ndaikatúi vaicha ñamohenda porãmba ñande rekove. Ha naiporãmbáiramo jepe niko ndaivaipái ave. Umi jejopy ha arhél ndofaltáiva pa’ũme ningo jajuhu ñanembyetia’e ha ñanemopu’ãva jaha haguã hese ñañentrega’ỹre.

Upéicha vaicha Jesús ou oike umi iñirũ apytépe, oñembotypáva hína kyhyjégui, ohechauka ichupekuéra umi klávo ha lánsa kuare, ndoje’óiva ipo ha ipyti’águi. Tomáme katu opokouka voi ojerovia haguã. Ani aipóramo che reindy ha nde che irũ, oimégui ñande kutu asy ha ñanembosufríva hína ñaimo’ã Ñandejára noime mo’ãiha ñane ndive.

Upépe katu ha’e ou ñane moirũ ha he’i ñandéve: “Py’aguapy toĩ pene ndive. Ame’ẽ peẽme Espíritu Santo.”

ÑAÑEMBO’E OÑONDIVE

Ñandejára Jesucristo, nde reikove jevy rire jepe reñongatúva ne korasõ kuaitépe ore jehasa asy, ore pytyvõmína ore avei romboguatakuaa haguã opaichagua júgo pohýi mborayhu pópe, nde rejapo háicha.

Amén.

Pa’i Alberto Luna.