Ñahendu Jesús Ñe’ẽ. Domingo III de Pascua

Escucha el evangelio y la reflexión en: https://youtu.be/XtnNv-8Vuag

Domingo III Pascua. Ciclo A

Lucas 24, 13 – 35

Upéva upe árape, mokõi Jesús disípulo oho hína Emaús puéblope, opytáva 11 km rupi Jerusaléngui.

Ha oñe’ẽ ohóvo hikuái umi mba’e ojehu va’ekuére. Oñomongeta jave ohóvo hikuái hína, Jesús ete voi oñemboja hendápekuéra ha oguata ohóvo hendivekuéra. Ha umi mokõi ohechárõ jepe chupe, ndoikuaái mávapa ha’e. Jesús osẽ oporandu chupekuéra: — Mba’e rehe piko peñomongeta pehóvo.

Ha opyta oñembo’y umi mokõi, hovasy hikuái. Upépe, pe Cleofás hérava osẽ he’i Jesúspe: — Ndénte piko opa Jerusalengua apytépe upe ndereikuaáiva pe ojehu vaekue ko’ã ára ohasa va’ekuépe.

Jesús he’i chupekuéra: — Ha mba’éiko ojehu.

He’i chupe hikuái: — Ku Jesús Nazaretguápe ojehu va’ekue. Proféta mbarete vaekue niko ha’e opa mba’épe, Ñandejára renondépe ha opavave renondépe. Upéi katu ñande pa’i ha ñande ruvichakuéra omosãingo kurusúre. Ore niko roimo’ã ha’e hague pe ou va’erãva osalva Israélpe.

Ha ojapóma mbohapy ára omano hague. Ko pyharevépe katu, kuña nguéra oĩva ore ndive tuicha ore mondýi. Oho ra’e hikuái ko’ẽ mboyve pe hete oñemoĩ haguépe. Ha ndojuhúimarõ upépe hetekue, ou hikuái omombe’u oréve aipo Ñandejára ánhel ojechauka hague chupe kuéra. He’i ndaje chupe kuéra umi ánhel, Jesús oikove jey hague. Oĩ katu ohóva ore apytégui ohecha haguã añetépa pe he’íva umi kuña, ha ojuhu hikuái peichaha.

Jesúspe katu ndohechái hikuái.

Upépe Jesús he’i chupekuéra: — Peichaite peve piko pene resatũ ha pende py’a ratã kuaa. Hasyete piko peẽme perovia haguã umi mba’e proféta kuéra he’i vaekue. Ndapeikuaái nga’u piko pe Mesías ohasa va’erãha voínte ko’ã mba’ére ojupi mboyve Ñandejára ndive yvágape.

Upéi oñemoĩ omyesakã chupe kuéra umi Ñandejára Ñe’ẽme oñe’ẽháme hese. Oñepyrũ umi Moisés oheja vaekuégui ha oguãhẽ umi proféta he’i va’ekue peve.

Oguãhẽvo hikuái Emaúspe, Jesús ojapo ku ohovétarõ guáicha hapére. Umi disípulo katu he’i chupe: — Epytána ore ndive. Ka’aruetéma niko, ha agãitéma pytũta hína.

– Ha opyta Jesús hendive kuéra. Ha oñemohendávo hikuái mesápe, Jesús ohupi ipópe pan, ome’ẽ grásia Ñandejárape, omboja’o ha ome’ẽ chupe kuéra. Upépe ojehesa pe’a sapy’a hikuái ha oikuaa Jesúspe. Ha’e katu ndojehechavéi sapy’a hendondépekuéra.

Ha he’i hikuái ojupe: — Ajeve niko ra’e túky-túky ñande py’a jajúvo tapére ha omyesakãvo ñandéve Ñandejára Ñe’ẽ.

Oha’arõve’ỹre, ojeity hikuái tapére ha ojevy hikuái Jerusalénpe. Upépe ojuhu ijatypa umi 11 apóstol ha iñirũnguéra. Umíva osẽ he’i:

— Añete nimbo ra’e Ñandejára oikove jey hague. Ojechauka kuri Simónpe.

Upépe umi mokõi omombe’u mba’épa ojehu chupe kuéra Emaús rapére, ha mba’éichapa oikuaa hikuái Jesúspe pan omboja’óvo.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

“Tapére oiko la guéi” he’i ningo ñe’ẽ. Ha oñeamansa mboyve katu heta ojetyvyro ha opyvoi. Upéinteko ou mbeguekatu ikane’õ, ohechakuaa vyresaha la oñemborretovadose gua’u, ou oñeamansa, oheja ijára omoĩ ijajúri pe júgo ha ojeity tapépe. Tuicha ideprovécho pe guéi oñeamansa rire. Heta omba’apo, oara, hetápe omongaru, ohupi carreta ári, ogueru provísta, ha amo ipahápe ideprovécho avei
oñekarneávo tembi’urã.

Jahecha Hesu oñeha’ã omosã jey hesaitévape, ogueru peve ichupekuéra korápe. Ha ndépa che irũ ha che reindy reñeamansáma Ñandejára júgo guýpe ojevale haguã nde rehe.

ÑAÑEMBO’E OÑONDIVE

Ñandejára Hesukrísto. Rehupíva pe júgo pohýi ha’éva nde kurusu embovevúi haguã ore pekádo. Ore pytyvõmína ore avei rohupi haguã ojupe ore kurusu, rombovevúi haguã ojupe ore rekove. Amén.

Pa’i Alberto Luna.