LECTURAS JUEVES 7º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Eclesiástico arandukápe oĩ háicha 5, 1-8

Ani rejerovia ne mba’e retáre ha ere: “Areko hetáma”.
Ani rejerovia ne mbaretére reiko haguã nde akãre.
Ani ere: “Ndaipóri oñemongaria’y va’erã chéve”, cháke Tupä Ñandejára omoengovia peteĩ teĩme hembiapo kuére.
Ani ere: “Ajapo ivaíva ha mba’eve ndojehúi chéve.”
Tupä Ñandejárako oporoha’arõ kuaa.
Ani ere, ha’e oheja reíta chéve, ha akóinte rejapo reikóvo ivaíva.
Ani ere: “Ha’éko oporoporiahuverekoiterei.
Ajapo ramo jepe heta ivaíva, ha’e oheja reíta chéve.”
Ha’e niko oporoporiahuvereko añete, opáichavo ipochy avei
ha ipochy vai umi iñangaipáva ndive.
Embopuku’ỹke rejevy haguã Tupä Ñandejárape ha ani reheja rehóvo ko’ẽrõ guarã, cháke ipochýne reimo’ã’ỹhágui ha sarambi ojapóne nde hegui. Ani rejerovia umi mba’e rehupity va’ekuére monda rupi, na ne pytyvõ mo’ãi oúvo nde ári ivaíva.

Tupã Ñandejára Ñe’ẽ

SALMO ÑEMBOHOVÁI 1, 1-4. 6

Opavave: Ovy’a va’erã umi ojapo’ỹva iñañáva Ñe’ẽ.

Ovy’a umi ojapo’ỹva iñañáva ñe’ẽ,
oiko’ỹva iñangaipáva ndive,
ha ndoguapýiva iñañáva atýpe
ojehe’a’ỹva umi Tupã Ñandejárare oñembohorýva ndive. O.

Tupã Ñandejára rembiapoukapy ipy’a ombohory,
ha hese ojepy’a mongeta ára ha pyhare.
Ojogua ku yvyra mátape oñeñotỹva y rembe’ýpe,
hi’áva hi’árape, ha ndahoguekúiva. O.

Ndaupéichai umi hembiapo vaíva,
kapi’i piru kuéicha umívape yvytu omboveve.
Tupã Ñandejára oñangareko imarangatúva rapére.
Hembiapo vaíva rape katu opa vai. O.

ALELUIA Cf. 1Tes 2, 13

Aleluia.
Pejapyhy Tupã Ñandejára Ñe’ẽ, ha ani yvypóra ñe’ẽicha,
pejapyhy pe añetete háicha Tupã Ñandejára Ñe’ẽicha.
Aleluia.

EVANGELIO

Marandu porã Ñandejára Jesucristo rekove ha hemimbo’e San Marcos omombe’u háicha 9, 41-50

Upe ramo Jesús he’i hemimombo’ekuérape: Oimeraẽ ome’ẽva peẽme, ymínte jepe, che ndive peiko haguére, añetehápe ha’e peẽme ndo pyta mo’ãiha hekovia’ỹre ichupe.

Oimeraẽ oitýva angaipápe peteĩ mitãicha che rehe ojeroviávape, iporãve va’erã ojeitýrõ ichupe yguasúpe ita guasu ijajúri. Ha nde po nde reitýtarõ angaipápe, eikytĩ. Iporãve reikove ramo Tupã Ñandejára ndive nde po peteĩ reheve, ha ani nde po mokõive reheve rejeity aña retãme, pe tata ogue’ỹháme araka’eve, umi yso omano’ỹháme ha tata máramo ogue’ỹháme. Ha nde py nde reitýtarõ angaipápe, eikytĩ.

Iporãve reikérõ jeikovépe peteĩ nde py reheve ha ani mokõive nde py reheve rejeity aña retãme, umi yso omano’ỹháme ha tata máramo ogue’ỹháme. Ha nde resa nde reitýtarõ angaipápe, eipe’a. Iporãve reike nde resa peteĩ reheve Tupã Ñandejára oisãmbyhyhápe, ha ani mokõive nde resa reheve rejeity aña retãme, umi yso omano’ỹháme ha tata máramo ogue’ỹháme.

Opavave niko oñembojuky va’erã tatápe. “Juky niko iporã, ha nahe’ẽvéi ramo niko ndaikatu véima oñemohe’ẽ jevy, naiporã véima mba’everã. Perekóke juky pende pype ha peiko py’a guapýpe oñondive.”

Ñandejára Jesucristo Ñe’ẽ