Ñahendu Jesús Ñe’ẽ. Domingo II de Cuaresma

Escucha el evangelio y la reflexión en: https://youtu.be/GOoAGWLjotA

Domingo II Cuaresma. Ciclo A Mateo 17, 1 – 9.
Upérõ Jesús ogueraha Pédrope, Santiágo ha tyvýra Juánpe, ha ojupi hikuái peteĩ sérro ru’ãme. Upépe, henondépekuéra, Jesús rete iñambue ohóvo. Hova oñepyrũ omimbi kuarahýicha, ha umi ijao katu morotĩ sakã ha ojajaipa. Peichaháguinte katu ohecha sapy’a hikuái Moisés ha Elíaspe, oñemongetáva hína Jesús ndive.

Upépe Pedro osẽ he’i Jesúspe: — Mbo’ehára, ajépa iporãite ñaimembáre ko’ápe. Reipotárõ, na torojapo peẽme mbohapy kuarahy’ã pene rendaguã, peteĩ ne mba’erã, peteĩ Moiséspe g̃uarã, ha peteĩ Elíaspe g̃uarã avei.

Pedro oñe’ẽ aja hína katu, ou peteĩ arai omimbipáva ha ojaho’i chupekuéra. Pe araígui oñehendu he’íva:
— Kóva hína che ra’y ahayhuetéva, che mbovy’áva. Pejapo ha’e he’íva peẽme.

Idisípulokuéra ohendúvo upéva, ojeity yvýpe kyhyjepópe. Jesús katu oñemboja, opoko
hesekuéra ha he’i: — Pepu’ã, ani pekyhyje.

Ha opu’ãvo, ndohecha véima hikuái avavépe. Jesús ha’eñóntema oĩ. Oguejývo ohóvo hikuái pe sérrogui, Jesús he’i chupekuéra: — Aníke pemombe’u avavépe ko pehecha va’ekue, aikove jey peve omanóva apytégui.

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe sérro yvate jajupi hagu ã niko ndaha’éi vyrorei, ijetu’u imi hína. Ñaguahẽvo hu’ ã me katu jahecha mombyryve. Sérro guýpente japytáramo niko ñande jerere guánte jahecha. Hesu ohenói Pedro, Santiago ha Juánpe ojupi haguã sérro hendive. Oñondive oho hikuái. Ñande avei niko jaguata oñondive, ndaha’éi ñane ño jaipykúiva Ñandejára rape, ñane irũ nguéra ojeroviáva ndive jajupi sérro yvate, ñañeha’ã Hesu rapére.

Jaguatávo oñondive Hesu rapére, ñañeha’ãvo oñondive, Ha’e ojechauka ha oñeñanduka ñandéve, ome’ẽvo vy’a ha py’aguasu, osẽ ñande rapépe, ñanepytyvõ ha ñanemokyre’ỹ. Upéicha jave opaite mba’e hesakã ñandéve, ñama’ẽramo guáicha Hesu rováre ha jaha rei haguã hese. Upéicha jave jahupi va’erã pu’aka, jaguejy jey vove jaipykúi haguä ñande rape, ipukútava hína ñane renonderã.

He’i ñandéve Papa Francisco: “Pe jotopa Hesu ndive ñandejora pe ñane sãgui, ñaneapytĩva ñande jehe, ha ñande pe’a upe chenteségui, ombotýva ñande py’a ani haguã ñama’ẽ Ñandejárare, ani haguã ñañomoirũ ñande rapicha ndive. Ñama’ẽramo Hesúre ñaime tapépe ha nañakañýi.”

Nameméi jepe niko che irũ ha nde che reindy, hendy, hesakã ha omimbi ñande rape. Ndaha’éi opa ára jahecháva Hesu ojajái ñane renonderãme. Opáichavo ñañandu vove ichupe jaikuaa ha’e oĩha ñande ykére ha ñanera’arõha tenonderãve, ojehechauka jevytaha katuete ñandéve ñanembopy’aguapy haguã. Ha ipahápe osẽne ha’ete oipe’a haguã ñandéve yvága rokẽ mimbipa.

Pa’i Alberto Luna.