Ñahendu Jesús Ñe’ẽ. Jueves II de Cuaresma

Escucha el evangelio y la reflexión en:https://youtu.be/Nk2aD1MzxVA

Jueves II Cuaresma Lucas 16, 19 – 31.

Upérõ Jesús he’i umi fariséo kuérape: “Oikómi vaekue ndaje raka’e peteĩ karai irríkova, oñemondéva ao hepy-hepyvévape. Ha ára ko’ẽre ojapómiva karu guasu neporã-porãva hógape. Hóga renondépe katu oñemoĩmiva peteĩ mboriahu chapĩ hérava Lázaro. Hete niko ikurupa ha umi jagua oúmiva oheréi umi ijaiha. Lázarope niko hi’ã ohupyty michĩmínte jepe umi tembi’u rembyre pe óga jára meságui oñemombóva.

Peteĩ ko’ẽme Lázaro omano. Ha Ñandejára ángel kuéra ou ogueraha chupe yvágape ha omboguapy chupe Abraham ykére.

Upéi, omano ave pe rríko ha ojereraha oñeñotỹ, ha oho ojejuhu Aña retãme. Ha ohasa asy hágui hína upépe, ojesaupi sapy’a ha mombyry ohecha Abrahámpe, ha Lázarope ave oguapýva hína ijykére. Ha oñemoĩ osapukái: “Che ru Abraham, che poriahuverekóna. Emondomína Lázarope tomyakỹ ikuã apymínte jepe ha tou tombopiro’y chéve che kũ. Vaípe niko ajecha hína ko tatápe.”

Abraham katu he’i chupe: “Che ra’y, na ne mandu’ái piko amo yvýpe reikovépe, hembypa hague ndéve opaite mba’e. Lázaro katu, ivaikuete ohupyty vaekue. Ko’ágã, ha’e opytu’u ha ovy’a hína ko’ápe, ha nde katu ivaikuete reisu’u. Ha upéi ave, oĩ peteĩ yvykua pypuku ñane
pa’ũme, ha avave ndaikatúi ohasa ko’águi upépe, térã upéguio ko’ápe.”

Upépe pe rríko osẽ he’i: “Abraham, emondóna upéicharõ Lázarope che rogayguakuéra rendápe. Ha te’i umi 5 che ryvýpe anivéma haguã ojapo ivaíva ani ágã ha’ekuéra ave ou ho’a ko’ápe ha oiko asy.” Abraham katu he’i chupe: “Umi nde ryvy nga’u piko ndoguerekói Ñandejára Ñe’ẽ. Umíva niko ohecha vaerã hikuái ha ojapo upépe he’íva.” Pe rríko katu he’i: “Che ru Abraham, upéva niko na’iporãmbái. Peteĩ omano vaekue ohórõ hendápe kuéra, péicharõ oheja mba’éne hikuái heko vaikue.”

Abraham katu he’i chupe: “Nopenái ramo hikuái Moisés ha umi profétakuérare, piko openáta gua’u peteĩ omanóva oikove jevy ramo.”

Ñandejára Jesucristo ñe’ẽ

ÑAMBOGUEJY ÑANDE REKOVÉPE

Pe oiko asýva niko, he’i Hesu, ijehasa asy rupi oñembovevúi oveve haguã yvágape, oguapy haguã upépe Ñandejára ykére. Pe rríko vy’a saingópe oikóva katu huguái pohýi oveve haguã yvágape, tekotevẽ oñembovevúi imba’e retágui, ha ombohasa mieve mboriahúpe. Upéicha mante ijáta yvágape. Oñembotavy ha ipy’a hatãramo hapicha mboriahu jehasa asy renondépe ha ivy’arã rapykuérinte oikóramo katu, ombyaty hína tata iñakã ári oho haguã upéi ochyryry aña retãme, ha mba’everã ndovale mo’ãi chupe upépe imba’e reta. Upéicha nunga niko oiko hína ko káso Hesu omombe’úvape.

Ha mba’épa nde reñandu che reindy, ha nde che irũ, ko Ñandejára ñe’ẽ rehendúvo. Oimépa oñanduka ndéve ikatúva rejapomi ko kuarésma rapére jahávo Semána Sánta gotyo.

Pa’i Alberto Luna.