SÁBADO XII DEL TIEMPO ORDINARIO

Ko’ágã ñahendúta Tupã Ñandejára ñe’ẽGénesis arandukápe oĩ háicha                                               

18, 1-15

Tupã Ñandejára ojechauka Abrahámpe, Mambré ka’aguy ypýpe. Abraham oguapy aja hóga rokẽme ára hakuve jave, asajekue, ojesaupi ha ohecha mbohapy kuimba’e oñembo’ýva ijypýpe.

Ohecha vove ichupekuéra osẽ huguaitĩvo, oñesũ henondépekuéra, omboja isyva yvýre, ha he’i: Karai, aníkena rehasátei reguahẽ’ỹre sapy’aite. Ta nohẽna peẽme y  pejepyhéi haguã, ha pepytu’umi ko yvyra guýpe. Amoĩta avei peẽme hi’upy pejepy’a joko haguã, peipykúi mboyve pende rape. Tuichaitéma niko che mbojerovia pehasávo ko pende rembiguái róga ypy rupi.

Ha’ekuéra he’i: Néi, ropytáta.

Abraham oike pya’e porã kotýpe ha he’i Sárape: Pya’éke eru 20 kílo trígo ku’i iporãvéva ha ejapo ichugui  pan.

Upéi oho mymba korapýpe, ipojái peteĩ vakara’y kyrỹi porãre ha ome’ẽ hembiguáipe ojuka ha ombojy haguã. Upéi ogueru ichupekuéra kesu pyahu ha kamby upe so’o ka’ẽ reheve. Ha opyta kuarahy ãme hendive kuéra okaru aja hikuái.

Ha’e kuéra oporandu ichupe: Mamópa oime ne rembireko Sara?

Ha’e he’i: Oime kotýpe.

Peteĩ ha’ekuérava he’i: Águi 9 mésepe aju jevýta  ha ne rembireko Sara imemby kuimba’éta.

Sara ohendu hína ra’e ikoty rokẽme, upe oñe’ẽva kupépe. Abraham itujáma ha Sara iguãiguĩma. Ndou véima ichupe imba’asy guejy. Upévare ipukapo ñemiháme ha he’i ipy’a pýpe: “Ha’etéma! Ko’ágä  che guaiguĩ ha che kuetéma rire nga’u piko aikuaavéta vy’a che ména tuja ndive!”

Tupä Ñandejára katu he’i Abrahámpe: Mba’ére piko Sara opuka ha he’i: “Ha’etéma! Ko’ágã che guaiguĩrire piko che membýta!” Oĩta nga’u piko hasýva Tupã Ñandejárape guarã? Rehecháta hína. Aju jevýta ne rendápe águi 9 mésepe, ha Sara imemby kuimba’éta.

Sara katu okyhyje ha he’i: Che ndapukái.

Ha’e katu he’i ichupe: Aikuaa porã repuka hague.

Tupã Ñandejára Ñe’ẽ.

SALMO ÑEMBOHOVÁI Lc 1, 46-50. 53-55

Opavave: Tupã Ñandejára ndahesaraíri ipokatúgui

Che ánga oguerohory Tupã Ñandejára ipu’akapávape;

che espíritu hory Tupã Ñandejára, che pysyrõhára ndive. O.

Tupã Ñandejára omoĩ hesa che, hembiguái míre,

ha águi rire opa ára añehenóine ovy’áva;

pe Ipu’akapáva ojapógui mba’e guasu ete che pype.

Héra imarangatu! O.

Tupã Ñandejára oiporiahuvereko opa ára

umi ichupe omomba’e guasúvape.

Omoenyhẽ mba’e porãgui umi iñembyahýivape,

ha po nandi omondo umi imba’e retávape. O.

Oipytyvõ hembiguái Israélpe,

ha ndahesaráiri oiporiahuvereko haguã,

ha’e oñe’ẽ me’ẽ haguéicha ñanderu kuéra ypykue

Abraham ha iñemoñarépe. O.

ALELUIA Mt 8, 17

Aleluia.

Cristo ojapyhy ñande reko kangykue ha ohupi ijapére ñane mba’asy eta.

Aleluia.

EVANGELIO

Ñahendúta Ñandejára Jesucristo rekove ha hemimbo’e San Mateo omombe’u háicha  8, 5-17

Upe ramo Jesús oikévo táva Cafarnaúmpe, peteĩ mburuvicha Romagua oñemboja hendápe. Ojerure Jesúspe oipytyvõ haguã ichupe he’ívo: Karai, che rembiguái niko oime ógape. Ijapapa ite ha oñeno hasy ete.

Jesús he’i ichupe: Aháta amonguera ichupe.

Pe ñorairõhára ruvicha katu he’i: Karai, máva piko che, nde reike haguã che rógape? Eréntena okuerataha, ha che rembiguái okueráta. Che niko aĩ mburuvicha poguýpe, ha areko avei che po guypegua. Ha peteĩme ha’érõ oho haguã, upéva oho. Ambuépe ha’érõ ou haguã, upéva ou. Ha ha’érõ che rembiguáipe ojapo haguã ha’éva, ojapo.

Jesús ohendúvo upéva tuicha oguerohory, ha he’i umi hendive oĩvape: Añetehápe ha’e peẽme, Israelgua kuéra apytépe jepe ndajuhúiva péicha ite peve ojeroviáva Tupã Ñandejárare. Ha ha’eve peẽme: Heta oĩ oútava kuarahy resẽguio ha kuarahy reikéguio ha oguapýtava mesápe Abraham, Isaac ha Jacob ndive pe karu guasúpe oikótava Tupã Ñandejára oporosãmbyhy vove yvágape. Umi oĩ va’erã mo’ã va’ekue upépe katu, oñemosẽta okápe pytũmbýpe. Ha upépe ojahe’o soróta ha hãi mante omopururũta.

Upéi Jesús he’i pe ñorairõhára ruvichápe: Tereho nde rógape, ha upe rerovia haguéicha toiko ndéve.

Ha upepete okuera pe hembiguái.

Jesús oho Pedro rógape ha upépe ojuhu Pedro rembireko sýpe oñenóva tupápe, iñakãnundúgui. Ha opokóvo ipóre, pe akãnundu opi ichugui . Upépe ha’e opu’ã ha oñemoĩ ohecha mba’épa Jesús oikotevẽ.

Ha oguahẽvo pyhare, ojereraha Jesús rendápe heta oĩva mba’e pochy poguýpe. Iñe’ẽ mente Jesús omosẽ umi mba’epochy ha omonguera avei opa hasývape. Kóicha ojehu, oiko haguã heko itépe maranduhára Isaías kuatiañe’ẽ he’íva: “Ha’e oipe’apa ñande hegui ñane mba’asy ha ogueraha opa mba’e hasýva ñandéve.”

Ñandejára Jesucristo Ñe’ẽ