Ñahendu Jesús Ñe’ẽ. Jueves 1º Adviento

Escucha el evangelio y la reflexión en: https://youtu.be/-__W5fKc0Lk

Jueves 1 de Adviento

Mateo 7, 21. 24 – 27

Jesús he’i opavavépe: ‘Ndaha’éiko hína umi chéve he’íva: “Ñandejára, Ñandejára”, umi oikétava yvágape, Tupã Rréino pe. Umi ojapóva che Ru yvágape oĩva rembipotánte oikéta.

Upévare, pe ohendúva che ñe’ẽ ha ojapóva upe ha’éva, ojogua petei kuimba’e iñakã porãvape hogarã omopu’ã vaekue ita ári. Upéi ou oky ha okakuaa umi rraudal. Yvytu hatã oipeju ha ojejapipa pe ógare.

Péicharõ jepe ndo’ái, oñemboguapýgui ita ári. Pe che rendúva ha ndojapóiva che ha’éva katu, ojogua ku tekove tavýpe, omopu’ã va’ekue hogarã yvyku’i ári. Upéi ou oky ha okakuaa umi rraudal. Yvytu hatã oipeju ha ojejapipa pe ógare ha sarambikuépe ho’a, oñembyaipaite’.

Ñandejára Jesucristo ñe’ẽ.

ÑAMBOGUEJY ÑANDE REKOVÉPE…

Heta niko ñaime ñahenóiva Ñandejára réra, ñanemandu’áva hese opa ára, jajovasa jahasa kuévo tupao renondépe, ñañembo’ jake haguã. Oĩ katu omoĩva ijajúri kurusu, ha jahecha avei rosário térã medalla omoĩva.

Oime orekóva hógape Hesu, Tupãsy, sánto kuéra ra’anga, omyataindy ha omboyvotýva. Jaháva Caacupépe, jaguata, jajapo promesa, ñaguahẽ upépe ñañembo’e. Oĩ voi oñemombe’u ha okomulgáva, ha oguerúva ijehe Caacupe poty, mandu’arã.

Ñande obispo kuéra ijaty vaekue Aparecida, Brasílpe áño 2007 pe, he’i ñande cristiano ha’eha Hesu remimbo’e ha hembijokuái, discípulos y misioneros de Cristo”, he’i. Heta cristiano ko opyta pe temimbo’épente. Ohendu, oñehekombo’e, oikuaápa, orekopa kuatia certificado kuéra. Ha upéi ojejokuáita vove okañy, ndojekuaavéi tupaóre, ndohejái Ñandejára ojevale hesekuéra.

Hesu he’i ñandéve ndaha’éi hina pe jejopy ha ñeikotevẽme ñahenói haguére Ñandejára rérante jaikétaha hendive yvágape. Tekotevẽ ñamboguata imi ha ñamomba’apo ñande jerovia jaiko hárupi. Ñamoañete tembiapo rupive upe jaroviáva, ñande rógape, ñamba’apo hápe ha opárupi.

Mba’etekópa che irũ ha nde che reindy. Ndépa hína umi reguapýva ha mombyrymíguinte rehendu ha rema’ẽva. Térãpa nde jeheguimi avei. Ikatúko Ñandejára ojevalese nde rehe ha ndejokuaise mba’e hína. Eiko haguã misionero, misionera. Mba’épa ere ichupe. Epensamína kóvare.

Pa’i Alberto Luna.