Ñahendu Hesu. Miércoles I Adviento

Escucha el evangelio y la reflexión en:

Miércoles I ADVIENTO

Mateo 15, 29 – 37

Jesús osẽ ha oho mar Galilea rembe’ýpe. Ojupi peteĩ sérrope ha upépe oguapy. Ha heta umi oguahẽva hendápe, ogueraháva hendive kuéra umi ikarẽva, ohecha’ỹva, iñe’ẽngúva, paralítiko ha opaichagua hasývape. Umívape omoĩ joa hikuái Jesús renondépe, ha ha’e omonguera chupekuéra.

Ha opavave ohecha ramoite mba’éichapa umi iñe’ẽngúva oñe’ẽ jevy, paralítiko okuera, ikarẽva oguata porã, ha ohecha’ỹva ohecha jevy. Ha oñepyrũ omomba’e guasu hikuái Israel Tupãme.
Jesús ohenói idisípulo kuérape, ha he’i chupekuéra:

Aiporiahuvereko niko ko’ãvape. Ojapóma niko mbohapy ára oĩha ko’ápe che ndive, ha
ndoguerekovéima mba’eve ho’u va’erã. Namondoséi hógape ñembyahýire, ani ágã
tapére ipy’a mano mba’e.

Hemimbo’e kuéra katu he’i chupe: Mba’éicha piko jajuhúta tembi’u ñamongaru
haguã opavavépe. Ko’a rupi niko ndaipóri avave oikóva.

Jesús oporandu chupe kuéra: Mbovy pan piko pereko?
Ha’ekuéra he’i chupe: 7, ha pira mbovymi.

Upépe Jesús omboguapy yvýpe opavavépe, ha ohupi ipópe umi 7 pan ha umi
pira, ha oñembo’e Tupãme ohovasa haguã. Upéi omboja’o umi pan ha ome’ẽ hemimbo’e
kuérape, ha ha’ekuéra ome’ẽ opavavépe. Ha okaru hikuái hyvatã meve. Ha umi hembýva
ombyaty 7 ajaka renyhẽ.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

Tupãsy Caacupe árape, heta oime ohoséva itupaópe. Orahase upépe iñembo’e, hemikotevẽ, imba’e jerure ñande sýpe. Opaichagua ko oĩ hese ojepokãva. Mitãrusu, karai, kuñakarai, oime itujáva ha iguaiguĩva. Oĩ mboriahu ha oime oreko miéva, oime campesino, indígena, kampañagua, siudagua avei, imandu’áva hese.

Ñahendu kuri heta tapicha opáguio oñembojáva Kirito rendápe, oñepohano haguã imba’asy kuéragui. Ha Hesu oiporiahuvereko ha oipohano ichupekuéra. Ohecha kuaa avei ipo’iha la pióla hendivekuéra ha ndaiporiha la ijaviomi. Ha ndopoiséi chuguikuéra péichante, ani ãga tapére ipy’a mano mba’e ñembyahýigui.

Ha he’i apóstolkuérape okonvida haguã chupekuéra upe orekóva, omboja’o haguã michĩramo jepe. Ani hakate’ỹ ha oñembotavy hapicha remikotevẽgui.

Ema’ẽmína che irũ ha nde che reindy. Heta iterei niko umi oikotevẽva ojerepáva ñande rehe. Mamo piko nde ikatúta esolusionamba ichupe kuéra iproblema. Hesu ningo nosolusionambái avei. Ha’e ningo oipotánte eñandu nde avei upe ha’e oñandu háicha, ehecha kuaa avei nde rapicha remikotevẽ, emboja’o upe Ñandejára grásia erekomívagui ikatu haguãicha ohupyty opavavépe. Ha’e ojapo haguéicha.

Pa’i Alberto Luna.