Ñahendu Jesús Ñe’ẽ. Domingo 1º Adviento
29 noviembre, 2025Ñahendu Jesús. Miércoles I Adviento
2 diciembre, 2025
Escucha el evangelio y la reflexión en: https://youtu.be/EfOrQurSvPM
Martes 1º Adviento Lucas 10, 21 – 24
Umi 72 disípulo ou jey vove, Jesús henyhẽ sapy’a vy’águi oúva Espíritu Sántogui. Ha he’i: Romomba’e guasu che Ru. Yvága ha yvy niko ne mba’e. Romomba’e guasu reñomi haguére ko’ã mba’e umi iñarandu ha imba’e kuaávagui, ha reikuaauka umi heko mirĩ ha iñarandu’ỹvape. Upéicha voi che Ru nde reipota va’ekue ojehu.
Upéi Jesús ojere he’i opavavépe: “Che Ru niko omoĩ che pópe opaite mba’e. Avave ndoikuaái Ñandejára Ra’ýpe, Túva añónte. Ha avave ndoikuaái Túvape, Ñandejára Ra’y añónte, ha umi ojekuaaukávape Ñandejára Ra’y. Ha ojerévo idisípulokuéra gotyo, he’i chupekuéra año: “Ovy’aite va’erãnepa umi ohecháva ko peẽ pehecháva hína ko’ágã. Añetéko ha’e peẽme, heta proféta ha rréi hamba’e ohechase ha ohenduse va’ekue ko peẽ pehecháva hína. Chupekuéra katu nda’ijái va’ekue ohecha térã ohendu.”
Ñandejára Jesucristo ñe’ẽ.
ÑAMBOGUEJY ÑANDE REKOVÉPE
Umi jahechavéva omyakãva tembiapokuéra ñande tupao ha kapíllape niko ndaha’éi jepi poguasukuéra oñemomba’e guasúva. Ha upévare ningo oĩ he’íva: Mba’eíko karai huláno, Ña hulána, che rapicha tavy, cheichaguávante avei oúta oñemoñe’ẽkuaase gua’u chéve hína ko’ápe. Mba’épiko che mbo’éta kóva, ko che aikuaa porãva chúpe. Toúna pa’i, toúna hermana, obispo, toúna peteĩ ijestudiomiéva,peteĩ oleéva, iñarandúva, ñahendu haguã ikuentamíva.
Jesús niko ha’e vaekue peteĩ kuimba’e opaichaguáva, omba’apóva ipórupi itúva ndive ohupyty haguã ára ko’ẽre oikotevẽva. Ndaha’éi va’ekue karai guasu, ijestúdio hetáva, oúva tava guasúgui. Ña María membýnteko ha’e, ha karai José ra’y, mba’apohárava avei, opavave oikuaáva ivállepe mba’eichaguápa.
Ha Jesús niko oñemoirũ avei kuimba’e ha’eichaguáva rehe. Apostolkuéra niko mba’apohára meme va’ekue. Umi omyakã ñepyrũ vaekue ñande Iglésia ijypýpe niko Pedro, Juan ha Santiago, omba’apóva raka’e ikanóape ojeheka piráre peskáda hápe.
Eguatána che irũ ha nde che reindy. Umi Jesús oiporavo ha ojokuái va’ekue niko ndeichaguánte avei. Anietéke nde upéicharõ etĩ téra ekyhyje mba’e avave renondépe ndaha’éi haguére umi oñemomba’e guasúva rehegua. Ehecháma hína mba’éichapa Jesús oguerohory Ñandejárape ndoiporavói haguére karai guasu imba’e kuaávape ojevale haguã hesekuéra.
Pa’i Alberto Luna.