Ñahendu Jesús Ñe’ẽ. Tupãsy Caacupé ára

Escucha el evangelio y la reflexión en: https://youtu.be/AL1tvCYTWf0

8 de diciembre: Tupãsy Caacupe ára

Lucas 1, 26 – 38

Ha 6 mése haguépe, Tupã omondo Ánhel Graviélpe peteĩ pueblo Galilea pegua hérava Nazarétpe. Upépe oiko Maria, peteĩ kuñataĩ marã’ỹ, ome’ẽma vaekue iñe’ẽ omenda haguã Josére, Rréi David ñemoñare. Upe Ánhel oike María oĩháme ha he’i chupe: – Roguerohory, nde Tupã rembiporavo!

Ñandejára oĩ ne ndive. María oñemondýi ha opensa mba’énepa he’ise pe maitei ohendúva.

Pe Ánhel he’i chupe: – Ani rekyhyje, Maria, Tupã nde rerohory. Nde rye guasúta ha ne membýta, ha pe mitã rembohérata Jesús. Ha’e mba’e guasúta ha oje’éta hese: “Tupã Yvatetegua Ra’y”. Ha Tupã Ñandejára ojapóta chugui mburuvicha guasu, Rréi Davídcha. Ha’e oisãmbyhýta Israel retã guápe opa ára guarã.

María oporandu pe Ánhel pe: – Mba’éicha piko ojehúta upéva, ko che ndaikóiva gueteri kuimba’e ndive?

Pe Ánhel katu he’i chupe: – Espíritu Santo oikéta nde pype, ha Tupã Yvatetegua pu’aka oúta nde ári. Upévare, pe mitã oútava oñembohérata Imarangatúva ha Tupã Ra’y. Isabel, nde rogaguáva, imembýta avei, iguãiguĩma ramo jepe. Pe kuña oje’e va’ekue ndaikatuiha imemby, ojapóma 6 mése hye guasuha.

Tupãme guarã ndaipóri ikatu’ỹva.

Aipórõ María he’i: – Che, Ñandejára rembiguái. Tupã tojapo che rehe pe ere haguéicha. Ha uperire, pe Ánhel oho.

Ñandejára Jesukrísto ñe’ẽ.

ÑAMBOGUEJY ÑANDE REKOVÉPE…

“Tuicha mba’e pe ñande sy. Ha’anga ñañongatúva ñane ánga ruguápe tata rendýicha, ha ku mitãicha hese ñama’ẽ asỹva. Péicha ningo ko ñande sy Caacupe ra’anga jarekóva ápe tupaópe.

Ojejapo raka’e peteĩ yvyra máta poguasúgui okañy hague iguýpe ñande ypykue indígena José, oñemuñáva ka’aguýre ojejuka haguãicha. Ojesaupi Tupãsýre José ha oñemo’ã imanto guýpe ani haguã ojejuka. Ha ñande sy oma’ẽ imembýre ha omo’ã.

Tuicha mba’e pe ñande sy. Ñande sy Tupãsy Caacupe indígena mboriahu defendehára. Ha mba’épa oiméne ñande sy Tupãsy Caacupe indígena mboriahu defendehára oñandu raka’e ohecháramo ramoite oikóva. Indígena oñemuñáva ka’aguýre, juez pórupi orden de desalojo reheve oñemosẽva itapỹigui, ojehapýva hóga, ojetrosa ikóga, oñemuñáva yvy ha óga’ỹre oiko haguã Tupã mba’e jára ramo.

Ajépa ningo oiméne ho’a ipy’a yvýre ñande sy Tupãsy Caacupé, indígena ha mboriahu defendehára, ohechávo ñane retãme peichaite peve oñemombo kállere heta imembykuéra yty ramo guáicha.”

ÑAÑEMBO’E OÑONDIVE

Ñandejára Jesukrísto, ema’ẽva mboriahu oikotevẽva rehe. Ore pytyvõmíkena ore avei rodefende ha romoirũ haguã ore pehegue guaranikuérape, Tupãsy ojapo haguéicha. Amén.

Pa’i Jasy.

• Fragmento tomado de mi homilía de Caacupé 8 diciembre 2012.