Ñahendu Jesús. Domingo 2º Adviento

Escucha el evangelio y la reflexión en: https://youtu.be/JHP98XHgSDE

Domingo 2º Adviento Ciclo A Mateo 3, 1-12.

Umíva umi árape Juan Bautista opredika jey Judéa desiértope. Ha he’i:— Pembyasy pende pekádo ha pejeheja ichugui. Hi’aguĩma hína Ñandejára Réino.

Ko Juan rehe niko proféta Isaías imandu’a vaekue, omoĩ ramo guare ikuatiáre kóicha: “Oime peteĩ osapukáiva desiértope ha he’íva: Pembosako’i Ñandejárape haperã, pejapo chupe tape ikarẽ’ỹva.”

Juan ao ojejapo kaméllo raguekuégui ha iku’a jokuaha vakapígui. Ha hembi’u vaekue tuku ha eíra ka’aguy. Opavave Jerusalén ha Judeagua osẽ hendápe ohendu haguã iñe’ẽ. Ha péicha avei umi Jordán rembe’y rupi oikóva. Oñemombe’u hembiapo vaikuégui, ha Juan omongarai chupekuéra rrío Jordánpe.

Juan ohechávo umi fariséo ha umi saduséokuérava hetaha oúva oñemongarai haguã, he’i chupekuéra: — Peẽ mbói partída! Máva piko he’i peẽme ikatúne haguã pe pekañy pe kastígo Tupã omboútavagui. Pehechaukáke pejehejaha tembiapo vaígui. Ani peimo’ã peje haguére “Ore niko Abraham ra’y kuéra” ndojehu mo’ãiha peẽme mba’eve.

Cháke ha’e peẽme, Tupã ikatuha ko’ã itágui jepe ojapo Abraham ra’y. Cháke, hácha ojeitýtama yvyra rapóre. Opa yvyra hi’a porã’ỹva guive, ojeitýta ha oñemombóta tatápe. Che niko añetehápe ýpe pomongarai, pembyasy haguére pene rembiapo vaikue.

Upe oútava che rire katu pene mongaraíta Espíritu Santo ha tatápe. Ha’e imbareteve chehegui. Ha chéve nda’ijái isapatu jepe amosã. Pála ipópe ombovevéta ha oipe’áta pe koga’a ra’ỹi hakãngue reígui. Ha ñongatúta pe ha’ỹingue ha ohapýta umi hakãngue rei, peteĩ tata araka’eve ndoguemo’ãivape.

Ñandejára Jesucristo Ñe’ê

ÑAMBOGUEJY ÑANDE REKOVÉPE

Ko diciembre pe niko ñamohu’ã jahávo ñande guata ha ñane rembiapokuéra ha ñañeha’ã ñamosãmba ikatumíva guive. Caacupe ha Navidad rapére ñaime. Hyakuãma mbokaja poty ha Ñandejára jeju hi’aguĩve vaicha ñande hegui. Ñañemoĩma ñañepyrũ haguãicha peteĩ año pyahu. Jareko esperanza ikatúne haguã tenonderã iporãve ñande rekovemi.

Isaías he’i ñandéve jaipe’a haguã ñande rapégui umi ita guasu ha ñamyenyhẽ haguã umi sánha soro. Jajapo tape Ñandejárape ikatu haguãicha oguahẽ ñande rógape ha py’ápe. Ha’e mante ikatu ombopyahu ñande rekove.

Umi judíokuéra oho va’ekue oñemobe’u ha ombyasy hembiapo vaikue ha oñemongaraiuka Juan Bautista pórupi, omopotĩ haguã hekove ky’a. Ñama’ẽmi ñande avei ñande rapykuerére che irũ ha nde che reindy. Mba’épa rehechakuaa nerembiapo apytépe nahesakã mbáiva. Mba’épa hína nde rapépe umi ita guasu reipe’aséva ha umi sánha soro tekotevẽva emyenyhẽ. Mba’épa reipota Ñandejára
omopotĩ nde pype, ne korasõ ha de rekovépe. Noimeichéne piko ne pytyvõta mba’e reho ramo eñemombe’u mba’e, eñembojami upéi ekomulga ha eguapy Jesús ndive misa hápe.

Hi’ãite va’erã Ñandejára añetehápe nderupyty ko Navidápe, ha pe tekove pyahu ome’ẽva Ñandejára Espíritu Santo nembopy’aguapy. Hi’ãite upe pesebre guive Tupãsy María, José ha pe Niño ohovasa nde róga ha nde rekove.

Pa’i Jasy.