Ñahendu Hesu. Sábado I Adviento

Escucha el evangelio y la reflexión en: https://youtu.be/0Fnq8TIdw7I

Sábado I Adviento

Mateo 9, 35 – 10,1.5a.6-8

Jesús ohasa ohóvo umi pueblo peteĩ teĩ rupi. Ha mamo oĩháme itupaokuéra, upépe
ha’e oporombo’e. Omombe’u upe ñe’ẽ porã Ñandejára Reino rehegua, ha omonguera
opaichagua hasývape. Ha ohechávo hetaha umi ijatýva, oiporiahuvereko eterei
chupekuéra.

Ohecha kuaa ha’ekuéra ikane’õ ha ikangypaha ku ovecha ijara’ỹvaicha. Ha he’i apostolkuérape: Ajépa tuicha pe kokue ha heta hi’a, omono’õ va’erãnte mbovy.

Upévare, pejerure pe kokue járape tombouve umi ou va’erãme omono’õ.

Jesús ohenói umi 12 apostol kuérape ha ome’ẽ chupekuéra pu’aka omosẽ haguã aña,
ha omonguera haguã opaichagua mba’asy.

Péicha hína umi 12 apóstol réra: tenondete Simón hérava avei Pedro, ha tyvýra Andrés. Upéi Santiago ha tyvýra Juan, Zebedeo ra’ykuéra. Felipe ha Bartolomé, Tomás ha Mateo, impuesto ombyatýva Roma peguarã. Avei Santiago, Alfeo ra’y ha Tadeo.

Oĩ avei Simón, ha Judas Iscariote, pe upéi otraiciona va’ekue Jesúspe.
Jesús omondo hembiaporãme ko’ã 12 kuimba’épe kóicha ombo’e rire chupekuéra:

Tapeho umi ovecha Israelgua okañymbáva rendápe. Tapeho peikuaauka hi’aguĩmaha
Ñandejára Reino. Pemonguera hasýva, pemoingove jevy omanóvape, pemonguera umi
leprósope ha pemosẽ aña opavavégui. Peẽme niko oñeme’ẽ rei ko pu’aka, ani peẽ
pejerure hese mba’eve.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…

17–Upérõ che irũ ha che reindy – che reindy ha nde che irũ:

“Ore niko roikomínte ñaimo’ã ñakyrã pire”. He’i niko peteĩ purahéi. Ha hetáko añete oime ñande rapicha avave noma’ẽiva hese kuéra, oikomínteva upérupi. Ha’eteku hemby ha ndaijáiva ohupyty haguã avei oikotevẽva oiko porã haguã Ñandejára oipota háicha ha iderecho ojerure háicha.

Péva ohecha avei Hesu ivállepe oikoha ohechávo umi génte eta oikóva upérupi umi guácho tyre’ỹicha, avave opena’ỹva hese kuéra. Oguapy ipy’áre, oiporiahuvereko iterei chupekuéra ha he’i: Ajépa tuicha pe kokue ha sa’i oĩ oma’ẽva hese.

Hesu he’i jajerure vaerãha Ñandejárape ombouve haguã ñandéve cristiano kuña ha kuimba’e, mitãkuña ha mitãkuimba’e, oikóva hapicháre. Ombyaty ha ombo’éva grupo ha komunidápe, capilla pe, toiko catequista, celebrador, animador, hermana, pa’i, diácono, ñembo’e’ýva, ipohanóva hapichápe ñembo’épe.

Opaichagua hembijokuái omomýiva organización, oiko vaerãva ombo’e ha oñangareko tapicha tyre’ỹre, ombyatýva umi isarambíva, omosãjeýva umi iraríva, onohẽva tapepé umi okañỹvape.

Mba’épa ekarkula che irũ ha nde che reindy. Moõpa ikatu nde ndeja ko tembiapópe. Tuicha ningo upe Ñandejára kokue, oime va’erã ningo katuete nerenda ha nerembiaporã, ikatu hápe nde avei eipytyvõ. Mba’épa reñandu.

Pa’i Alberto Luna.