Ñahendu Hesu. Martes 3º Adviento

Escucha el evangelio y la reflexión en: https://youtu.be/9FmvDXXp0qY

Martes 3° de ADVIENTO Mateo 21, 28 – 32

Upérõ Jesús he’i umi pa’i guasu ha judío kuéra mburuvichápe:— Amombe’úta peẽme peteĩ karai ita’ýra mokõi vaekue káso. Pe karai he’i pe ijypykuépe, “Che ra’y, terehópy emba’apo ñandéve kokuépe.” Ta’ýra katu osẽ he’i chupe, “Ndahamo’ãi, ndahaséi”. Upéi katu ombyasy péicha ombohovái hague itúvape, ha osẽ oho.

Upe rire, pekarai oho ita’ýra pahague rendápe, ha he’i avei chupe oho hag̃ua omba’apo. Ta’ýra he’i itúvape, “Néi, che ru, aháta”, ha upéi ndohói. Peẽ pehechaháicha, mavaitévapa ojapo ra’eupe itúva ojerure vaekue chupe.

He’i chupe hikuái: — Ha pe ta’ýra ypykue.

Upépe Jesús he’i chupekuéra:— Añete ha’e peẽme, umi impuésto okovráva ha umi kuña reko vai raẽ oikéta pendehegui Ñandejára Rréinope. Juan Bautista niko ou va’ekue penembo’évo mba’éichapa peiko va’erã, ha peẽ napepenái va’ekue hese

Umi impuésto okovráva ha umi kuña reko vai katu oguerovia chupe. Ha peẽ pehecháramo jepe upéva, napembyasýi pende reko vaikue ha ndapehejái, perovia hag̃ua chupe.

Ñandejára Hesukrísto ñe’ẽ.

ÑAMBOGUEJY ÑANDE REKOVÉPE…
“Mborayhu ojechauka tembiapo rupive, ndaha’éi ñe’ẽmente”. He’i ningo San Ignacio de Loyola. Ha ndahasykuéi niko añete ja’e jahayhuha ñande rapichápe. Térã katu já’e jajapotaha ojejeruréva ñandéve.

Upéi jajapo haguã pe ja’e va’ekue katu “ótro pitopúma” hína. Upéicha avei oiko ñande jeroviápe. Jahechauka hína jahayhuha añete Tupãme ñañeha’ã rupi jajapo upe ojeruréva ñandéve. Ndaha’éi ja’e rupi jajeroviaha hese, térã ñembo’e rupive añónte.

Ha mba’épa oiméne Ñandejára ojerure ñandéve hína ko Navida gotyo jahávo, Niño ára potápe. Mba’épa oiméne he’ise ñandéve Hesu ko kásope. Pe túva ojokuáiva ita’ýra, ha itajýrape avei, oho haguã omba’apo ikokuépe.

Mba’épa ha’éta hína ndéveramo guarã, che irũ ha che reindy, pe kokue Ñandejára ndejokuaise hápe ehomi haguã emba’apo. Mba’épepa oiméne ha’e ojevalese nde rehe hína.

Sapy’ánte ko ikatu pe ojeruréva ñandéve ndaha’éi la igustopáva. Ikatu voi ñande rari, jajetyvyro ha “ndajahaséi” mba’e. Jajerure upéicha ñanekangy jave pe pu’aka jajapo haguã pe ñane rembiaporãva voínte. Ani ipu’aka ñande rehe ate’ỹ.

Pa’i Jasy.