ÑANDEJÁRA JEHECHAUKA – EPIFANÍA

LECTURA PETEÎHA:
Ko’ágã ñahendúta Tupã Ñandejára Ñe’ẽ Isaías arandukápe oĩ háicha 60, 1-6

Epu’ã Jerusalén, mimbipápe ejaho’i, péina oguahẽma nde resapeha ha Tupã mimbipa hendy nde ári!
Pyhare ojaho’i yvy, ha tetãnguéra pytũme oñeñuã, Tupã katu nde ári ojajáita, ha heko mimbipa nde ári ojechaukáta.

Tetãnguéra oúta nde resapeha gotyo, ha mburuvicha guasukuéra ne ko’ẽju mimbi gotyo.
Ejesaupi ha ema’ẽ nde jere kuévo: opavave oñembyaty ha ou ne renda gotyo. Ne memby
kuimba’e kuéra oúta mombyrýgui, ne memby kuña nguéra ojererúta jyva ári.

Nde rehechávo ichupekuéra revy’aitereíta, nde py’a renyhẽta vy’águi. Oguerúta hikuái ndéve mba’e repyeta tetã mombyrýgui.
Ome’ẽta hikuái ndéve heta mba’e tetãnguéragui oguerúva. Kamélloita Efá ha Madiángui oúva nde aho’íta, Sabaygua ou joáta, imbayrukuéra henyhẽ óro ha insiénsogui, omombe’u joávo imombe’upyrã Tupã ojapóva.

Tupã Ñandejára Ñe’ẽ.

Opavave: Romomba’e guasu ndéve, Ñandejára.

SALMO ÑEMBOHOVÁI 72, 1-2. 7-8. 10-13
Opavave: Tetãnguéra pemomba’eguasu Ñandejárape.
Ñandejára, eme’ẽ mburuvicha guasúpe teko joja
ha mburuvicha guasu ra’ýpe teko potĩ,
ikatu haguãicha ne retã oisãmbyhy hekopete,
ha imboriahúvape ohecha kuaa. O.

Nde rekovépe ta ipotyjera tekojoja
ha ta ne añua py’aguapy, jasy opaha ára peve.
toĩ ipo guýpe peteï ysyry guasu guive ambue peve,
ha ysyry guasu guive opaha peve arapy. O.

Mburuvicha guasu Tarsis ha tetã mombyrygua
to mba’e me’ẽ ichupe opa árape,
mburuvicha guasu Sabá ha Sebá pegua
to me’ẽ ichupe hetã mba’e.
Opavave mburuvichakuéra to ñemomichĩ henondépe.
Opavave tetãnguéra to ñemoĩ ipo guýpe. O.

Ha’e oguenohẽta imboriahúvape jejopy vaígui ojerure vove ichupe,
ha oikotevẽvape ndorekóiva mamo oho haguã.
Oiporiahuverekóne heko mirĩva ha ojeheja reívape
ha ichupe oguenohẽne jejopy vaígui. O.

LECTURA MOKÕIHA:

Ñahendúta Tupã Ñandejára Ñe’ẽ San Pablo ohai va’ekue Éfeso guápe 3, 2-6

Che pehenguekuéra: Pehendúmane ra’e Tupã imba’e porã rupi, ome’ẽ hague chéve amba’apo haguã pende apytépe. Ñandejára oikuaauka va’ekue chéve umi mba’e ha’énte oikuaáva ha ojaposéva, amombe’úma haguéicha peẽme mbykymi.

Upéva pehechávo, pehecha kuaáta che aikuaaha umi mba’e Ñandejárante oikuaáva Cristo rehegua, ha avavépe ndojekuaaukái va’ekue araka’eve. Ko’ágã katu, Ñandejára oikuaauka umi mba’e, ijapóstol ha imaranduhárakuéra marangatúpe ijespíritu rupi.

Upe mba’e Ñandejára ndoikuaaukái va’ekue niko kóva: Marandu porã Cristo ogueru va’ekue rupi, Ñandejára ohenoiha opaichagua tetã guápe ha ohupityuka ichupekuéra umi ha’e ome’ẽ va’ekue imba’e teerã Israel guápe, peteĩcha oiko haguã hikuái peteĩ tete rehegua ramo ha opavave ohupyty haguã umi mba’e Ñandejára he’i va’ekue ome’ẽtaha.

Tupã Ñandejára Ñe’ẽ.

Opavave: Romomba’e guasu ndéve, Ñandejára

ALELUIA Mt 2, 2
Rohecha niko kuarahy resẽme mbyja ichupe omohenondéva, ha roju romomba’e guasúvo ichupe.
Aleluia.

EVANGELIO
Marandu porã Ñandejára Jesucrísto rekove ha hemimbo’e San Mateo omombe’u háicha 2,1-12

Opavave: Romomba’e guasu ndéve, Ñandejára.

Jesús niko onase va’ekue Belénpe, Judéape. Herodes va’ekue rréi upérõ. Oguãhẽ katu Jerusalénpe, kuarahy resẽ guio oúvo, mbohapy karai arandu.

Oguãhẽmba riremínte oporandu hikuái upépe: — Moõiko oime pe mitã onase va’ekue hudíokuéra rréirã. Rohecha niko kuarahy resẽme mbyja chupe omohenondéva. Ha roju hína romomba’e guasu haguã chupe.

Herodes oikuaávo upéva ipy’a tarovaite. Ha opa Jerusalengua upéichante avei. Upémarõ, Herodes ombyatypa ijerére pa’i ruvichakuéra, ha umi hudíokuéra léi ombo’éva. Ha oporandu chupekuéra moõpa onase va’erã ra’e pe Mesías.

Ha’ekuéra he’i chupe: — Belénpe, Judéape. Proféta niko oheja va’ekue kuatiápe he’i ramo guare kóicha: “Ha nde Belén reiméva Judápe, nane michĩvéi mba’eveichave ramo puéblokuéra apytépe upe tetãme. Ndehegui osẽta rréi oisãmbyhýtava che retã Israel.”

Upépe, Herodes ohenoika kañyháme umi karai arandúpe. Ha oporandu chupekuéra araka’etépa ohecha ra’e hikuái pe mbyja. Upéi katu omondo chupekuéra Belénpe, he’ívo: — Tapeho peikuaa porã moõpa oĩ hína pe mitã. Pejuhu rire, peju pemombe’u chéve. Che ave ahase amomba’e guasu chupe.

Herodes oñe’ẽmba riremi, umi karai arandu osẽ oho. Ha pe mbyja ha’ekuéra ohecha va’ekue kuarahy resẽvo, oho henonderã.
Upéi katu opyta pe óga pe mitã oĩha ári. Umi karai arandu ohechávo moõpa opyta pe mbyja tuicha ovy’a. Oike hikuái pe ógape, ha upépe ohecha pe mitãmi, isy María ndive.

Oñesũ ha omomba’e guasu chupe hikuái. Upéi katu oguenohẽ ikarameguãgui óro, insiénso ha mírra ryakuã porã, ha ome’ẽ chupe. Ñandejára he’i rire chupekuéra iképe ani haguã oho Herodes rendápe, osẽ oho hikuái hetãme ambue tape rupi.

Ñandejára Jesucrísto Ñe’ẽ.

Opavave: Romomba’e guasu ndéve, Ñandejára Hesukrísto.