Lecturas del 24 de agosto
24 agosto, 2019LECTURAS DEL MARTES 27 DE AGOSTO
27 agosto, 2019LECTURAS DEL LUNES 26 DE AGOSTO
Primera Lectura
Ñahendúta Tupã Ñandejára Ñe’ẽ San Pablo ohai va’ekue Tesalónica guápe
1, 1-10
Pablo, Silvano ha Timoteo romomaitei Jesucristo iglésia, Tesalónica guápe, ojoajúva Tupã ñande Túva ha Ñandejára Jesucristo rehe. Tupã ñande Túva ha Ñandejára Jesucristo to hekuavo ipytyvõ ha ipy’aguapy pende ári.
Tapia rome’ẽva ore aguyje Tupã Ñandejárape pende rehe, ha ore mandu’a pende rehe ore ñembo’épe.
Manterei ore mandu’a Tupã ñande Túva renondépe, mba’éichapa heta mba’e pejapo pende jerovia rupi, mba’éichapa pene mborayhu tuichágui hetápe peipytyvõ, ha mba’éicha ite pevépa peha’arõ kuaa Ñandejára Jesucrístope.
Ore pehẽngue kuéra, ore niko roikuaa Tupã Ñandejára pende rayhuha ha pende poravo hague. Ako roikuaauka ypy ramo peẽme marandu porã niko, ndaha’éi va’ekue ñe’ẽme añónte, heta mba’e hechapyrãme katu, ohechaukáva Tupã ha Espíritu Santo pokatu, ha roikuaa porãgui añeteha.
Peikuaa porã mba’éichapa ore mba’e porã pene ndive, rohekávo peẽme guarã iporãva.
Pende hegui, Ñandejára Ñe’ẽ iñasãi, ndaha’éi Macedonia ha Acáyape añónte, opa rupi katu, ha ojekuaa pe jerovia peẽ perekóva Tupã Ñandejárare, ha upéicha rupi natekotevẽ véima ore ro’e mba’eve. Ha’e kuéra voi katu oñe’ẽ peẽme ore guahẽre, ha mba’éichapa peheja umi ta’ãnga rei ha pejevy Tupã Ñandejára gotyo, oikove ha añeteguáva, pejapo haguã ha’e oipotáva. Ha avei peha’arõha ou jevy yvágagui Jesús, pe Tupã Ra’y, Tupã omoingove jevy va’ekue. Jesús niko pe ñande pe’áva pe ñenupã vai ete oútavagui.
Tupã Ñandejára Ñe’ẽ.
SALMO ÑEMBOHOVÁI 149, 1-6a. 9b
R. Tupä Ñandejára niko ohayhu hetã guápe
To ñemomba’e guasu Tupä Ñandejára,
pepurahéi Ñandejárape purahéi pyahu umi hese ojeroviáva
atýpe ichupe to ñemomba’e guasu. Israelgua to guerohory ijapo harépe, Siongua to guerohory huvicha guasúpe. R.
Héra rehehápe pejeroky, tambor
ha árpa púpe ichupe pepurahéi,
Tupä Ñandejára niko ohayhu hetã guápe,
imboriahúvape oguenohẽ jejopy vaígui. R.
Ta hory hesehápe umi imarangatúva,
oñenoháme jepe ichupe to purahéi.
Ijurúgui ta ñahendu omomba’e guasúrõ Tupã Ñandejárape,
ipópe to guereko kyse puku hãimbe jováiva. R.
ALELUIA Jn 10, 27
Aleluia.
Ñandejára Jesucristo he’i: Che ovecha kuéra ohendu che ñe’ë, Che aikuaa ichupe kuéra ha ha’e kuéra oho che rapykuéri.
Aleluia.
EVANGELIO
Ko’ágä ñahendúta Ñandejára Jesucristo rekove ha hemimbo’e San Mateo omombe’u háicha. Pejapysaka porãtapa hese?
23, 13-22
Upe ramo Jesús he’i péicha: Pejererekóke peẽ Moisés rembiapoukapy mbo’eha ha peẽ fariséo kuéra rova mokõi!
Peẽ pemboty Tupã Ñandejára sãmbyhy yvága pegua rokẽ ani haguã avave oike. Peẽ voi ndaikatúi peike, ha ndapehejái umi oikesévape oike.
Pejererekóke peẽ tembiapoukapy mbo’eha ha peẽ fariséo kuéra rova mokõi! Peẽ peipe’apa hóga umi kuña imenave’ỹvagui ha upéi katu pembohasa haguã, peñembo’e puku puku. Upévare peẽ peñenupã pohyivéta.
Pejererekóke peẽ Moisés rembiapoukapy mbo’eha ha peẽ fariséo kuéra rova mokõi! Peẽ pehóva opa rupi ko yvy ári, ha pehasa yguasu mboypýri ave, peteĩnte jepe pembojerovia haguã Tupã Ñandejárare, judío kuéraicha. Upéva pejapo haguére, ha’e kuéra oho jo’a jo’a va’erã aña retãme.
Pejererekóke peẽ moakãhára resatü! Peẽ peje: “Oime ramo ome’ẽva iñe’ẽ Tupao rehe ojapotaha peteĩ mba’e, upéva ndaha’éi mba’eve. Ha oimérõ katu ome’ẽva iñe’ẽ pe óro Tupao peguáre, peẽ peje ojapo mante va’erãha pe he’i haguéicha. Peẽ tekove tavy resatũ!
Máva piko pe mba’e guasuvéva? Pe óro piko, térãpa pe Tupao? Pe óro niko oñemboyke Tupã Ñandejárape guarã Tupao ryepýpe oĩ haguére.”
Peẽ peje avei: “Oime ramo ome’ẽva iñe’ẽ altar rehe ojapotaha peteĩ mba’e, upéva ndaha’éi mba’eve. Ome’ẽ ramo iñe’ẽ umi mba’e kuave’ẽ altar ári oĩvare katu, ojapo mante va’erã pe he’i haguéicha.” Peẽ tekove tavy resatũ! Máva piko pe mba’e guasuvéva? Umi mba’e kuave’ẽ, térãpa pe altar?
Umi mba’e kuave’ẽ niko oñemboyke Tupã Ñandejárape guarã oĩ haguére pe altar ári. Pe ome’ẽva iñe’ẽ altar rehe, nome’ẽi iñe’ẽ pe altar rehe año. Ome’ẽ hína iñe’ẽ opa mba’e hi’ári oĩvare. Ha pe ome’ẽ iñe’ẽ Tupaóre, nome’ẽi iñe’ẽ Tupaóre año. Ome’ẽ hína iñe’ẽ Tupã Ñandejárare, ypýpe oikóvare. Upe iñe’ẽ ome’ẽva yvágare, ome’ẽ hína iñe’ẽ Tupã Ñandejára guapyháre ha Tupã Ñandejára, upépe oguapýva rehe voi.
Ñandejára Jesucristo Ñe’ẽ