LECTURAS JUEVES 1º TIEMPO DURANTE EL AÑO

LECTURA PETEÎHA:

Ko’ágã  ñahendúta Tupã Ñandejára ñe’ẽ Samuel arandukápe oĩ háicha  4, 1b-11

Filistéokuéra oñemboaty oñorairõ haguã Israelgua ndive. Israelgua osẽ ichupekuéra oñorairõ haguã oñemboatývo Eben-Ézer ypýpe. Filistéokuéra katu oñemboaty táva héravape Afec, ha upépe oñemohenda hikuái ondyry haguã Israelguáre.

Oñepyrũ ñorairõ ha filistéo kuéra ipu’aka Israelguáre; ojuka 4.000 kuimba’e Israelgua pe ñúme. Israelgua ojevývo hekohápe, moakãhára  kuéra he’i: “Mba’ére piko Tupã Ñandejára oheja filistéokuéra ipu’aka ñande rehe?

Jaha jaru Sílogui Tupã karameguã ñe’ẽ ñome’ẽ rehegua ha toho ñane ndive ñorairõme ñande pe’a haguã filistéo kuéragui!” Upévare Israelgua omondo Sílope ojegueru haguã upégui Tupã Ñandejára ipu’akapáva karameguã marangatu, oguerekóva iguapyha keruvim ári. Mokõive Elí ra’y Ofní ha Pinjás omoirũ avei Tupã Ñandejára karameguã. Oguahẽvo Tupã Ñandejára karameguã Israelgua oñemohenda haguépe, Israelgua hatã osapukái ha omboryryipa pe yvy.

Filistéokuéra ohendúvo pe sapukái oporandu: “Mba’e piko he’ise upe sapukái hebréo kuéra apytépe?” Oikuaa vove Ñandejára karameguã oguahẽ hague, okyhyjepa hikuái ha he’i: “Tupã oguahẽ hekohápe. Águi katu jaikopáma hese! Mávapa ñande pe’áta ani haguã ja’a tupã imbaretetéva pópe?

Ha’e hína pe ohundi va’ekue Egipto guápe yvy ojeiko’ỹháme oitývo hese kuéra opaichagua ñenupã pohýi. Néi katu! Pende py’a guasúke kuimba’e filistéokuéra! Peñorairõ mbaretéke ani peiko hebréo rembiguái ramo, ha’ekuéra oiko haguéicha pene rembiguái ramo!”

Filistéo oñorairõ ha Israelgua ho’a ipópe kuéra ha peteĩ teĩ oguevi oñemohenda hague gotyo. Jejuka nde’áva niko pe oikóva! 30.000 kuimba’e yvy rupigua omano Israel guágui. Filistéo kuéra oñemomba’e avei Ñandejára karameguã rehe ha ojuka avei hikuái mokõive Elí ra’ýpe Ofní ha Pinjás.

Tupã Ñandejára Ñe’ẽ.

SALMO ÑEMBOHOVÁI  43, 10-11. 14-15. 24-25

Opavave: Tupã, ore Jára, ore pe’amína jejopy vaígui

Ko’ágã  katu ore reja rei, ha ropyta roñemotĩ.

Neresẽvéiva ore ndive ñorairõháme,

ore reja roguevi umi ore rayhu’ỹva renondépe,

ha umi ore rayhu’ỹva ore mondapa. O.

Ojepukapa ore rehe, omaña tie’ỹ ore rehe

ha oñemohembe jere oréve.

Nde rupi umi ore jere rupi oikóva

itie’ỹ oréve, oñembohory ha opuka ore rehe. O.

¡Epáy Tupã Ñandejára! Mba’érepa reke.

Mba’ére piko rekañy ore hegui,

ha nerepenái ore rehe, ko rohasa asy etéva?

Norome’ẽ véima niko, ha yvýre rotyryry. O.

ALELUIA  Cf. Mt 4, 23

Aleluia.

Ñandejára Jesucristo omoerakuä va’ekue Marandu porã Yvága rehegua ha omonguera opaichagua mba’asy ha hasývape.

Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha     1, 40-45

Upe ramo guare peteĩ kuimba’e ikuru vaíva oñemboja Jesús rehe ha ñesũháme he’i ichupe: Nde reipotárõ che mongueráne che mba’asýgui.

Jesús oiporiahuvereko ichupe. Opoko hese ha he’i ichupe: Aipota. Ekuera!

Upe vove ojei ichugui  ikuru vai, ha okuera. Jesús omondo pya’e ha he’i jevy ichupe: Aníke emombe’u avavépe. Terehónte ejechauka pa’ípe, ha eikuave’ẽ Tupä Ñandejárape umi mba’e Moisés he’i va’ekue oñekuave’ë va’erãha, ojehecha haguã rekueramaha. Pe kuimba’e katu oho ha omombe’u opa rupi upe ojehu va’ekue.

Upévare Jesús ndaikatu véima oike umi távape, umi okahárente opytáva. Ha opa guio ojehova hendápe.

Ñandejára Jesucristo Ñe’ẽ.