LECTURAS SÁBADO 4º TIEMPO DURANTE EL AÑO

LECTURA PETEÎHA:

Ko’ágã ñahendúta Tupã Ñandejára ñe’ẽ Reyes arandukápe oĩ háicha 3, 4-13

Mbruruvicha guasu Salomón oho avei Gabaónpe oikuave’ẽ haguã mymbajuka, upéva ha’égui upe ijyvate itenondevéva. Ha oikuave’ẽ jepi upépe 1.000 mymbahapy.

Peteĩ pyhare Gabaónpe, Tupä Ñandejára ojechauka Salomónpe iképe, ha he’i ichupe: “Ejerure reipotáva ha ame’ẽta ndéve.”

Salomón he’i ichupe: “Nde py’a porã ite va’ekue niko ne rembiguái che ru David ndive, ha’e oguata haguére nde rape rupi teko jeroviaha, teko joja ha py’a potĩme.

Upévare rehayhu ichupe ha reme’ẽ ichupe peteĩ ita’ýra oguapy haguã iguapyhápe, ko’ágä ojehu haguéicha. Nde, Tupã che Jára, che moĩ aisãmbyhy haguã che ru David rendaguépe, jepe ramo che mitã rusu aikuaa guasu’ỹva gueteri mba’eve. Ha amoakã upe tetã nde reiporavo va’ekue.

Umi ne tetãgua niko heta iterei, ykatu’ỹva jaipapa. Eme’ẽna chéve katupyry ha akã porã aisãmbyhy haguã ne retã guápe, aikuaa haguã iporãva ha ivaíva; ýrõ piko máva oisãmbyhýta heta ite ne retã guápe?”

Tupä Ñandejárape ombovy’a ko ojeruréva Salomón, ha he’i ichupe: rejerure haguére chéve kóva, ha ndaha’éi jeikove puku, térã mba’eta, térã nde rehe ija’e’ỹva omano haguã, rejerure uvei katupyry ha akã porã reporohendu ha reisãmbyhy kuaa haguã, ajapóta rejerure va’ekue: ame’ẽta ndéve arandu ha akã porã, oguereko’ỹ haguéicha avaveichagua mburuvicha guasu nde mboyve guare ha oguerekove’ỹtava avave nde riregua.

Upéva ári, ame’ẽta avei ndéve mba’eta ha teko jajaipa nde rejeruréi va’ekue, ha péicha rupi, reikove aja pukukue, ndaipóri mo’ãi mburuvicha guasu ndeichagua.

Tupã Ñandejára Ñe’ẽ

SALMO ÑEMBOHOVÁI 118, 9-14

Opavave: Tupã Nandejára ehechauka chéve ne rembipota

Mitã rusúpa mba’éicha ikatúne hekove ogueraha porã?
Oiko ramo ne ñe’ẽ he’i háicha.
Che ãho nde rehe, ani rehejátei
añemomombyry ne rembiapoukapýgui. O.

Che py’a pýpe ne ñe’ẽ añongatu
ani haguã ajapo ivaíva ne renondépe.
Nde niko tuicha mba’e hína ore Jára,
ehechauka chéve ne rembipota. O.

Umi ñe’ẽ nde jurúgui osẽva
opa henda rupi ahenduka.
Ne rembipota ajapo ramo avy’ave
opa mba’e areko ramo guágui. O.

ALELUIA Jn 10, 27

Aleluia.
Ñandejára Jesucristo he’i: Che ovechakuéra ohendu che ñe’ẽ,

Che aikuaa ichupekuéra ha ha’e kuéra oho che rapykuéri.
Aleluia.

EVANGELIO

Ko’ágã ñahendúta Ñandejára Jesucristo rekove ha hemimbo’e San Marcos omombe’u háicha 6, 30-34

Upe ramo Jesús remimbo’ekuéra oñemboaty Jesús ndive ha omombe’u ichupe opa mba’e ojapo ha ombo’e va’ekue.

Jesús he’i ichupekuéra: Jaha japytu’umi ñane año peteĩ ojeiko’ỹháme. Heta etereígui umi ou ha ohóva niko ndaijái ichupekuéra okarúvonte jepe.

Upéicha Jesús ha hemimbo’ekuéra oho kanóape peteĩ ha’eñoháme. Heta oĩ ohecháva ha oikuaa ha’e kuéraha. Upérõ opa távaguio ojeho upe gotyo ha oguahẽ hikuái ha’ekuéra mboyve.

Oguejývo Jesús pe kanóagui, ha ohechávo hetaha umi ijatýva, oiporiahuvereko ichupekuéra, oĩgui ovecha herekua’ỹ vaicha. Ha oñepyrũ ombo’e ichupe kuéra heta mba’ére.

Ñandejára Jesucristo Ñe’ẽ